Ish-presidenti i SHBA-së, Barack Obama, pritet që “së shpejti” të shpallë mbështetjen e tij për Kamala Harris, për emërimin e kandidates demokrate në zgjedhjet e nëntorit në SHBA.

Sipas asaj që shkruan NBC News, Obama dhe Harris janë në kontakt të vazhdueshëm pas shpalljes së kandidaturës së saj për nominimin e Demokratëve, duke pasur disa diskutime në 24 orët e fundit.

Sipas të njëjtave burime, ish-presidenti amerikan tashmë ka shprehur privatisht mbështetjen e tij për nënpresidenten amerikane.

“Ai është në kontakt të ngushtë me të dhe mendon se ajo ka një fillim të mirë,” tha një nga burimet e NBC.

Një tjetër burim shpjegoi se Obama dhe Harris, duan që shpallja e mbështetjes të jetë një moment i veçantë. Sipas të njëjtave informacione, shtabet e tyre janë në konsultim për të bërë një paraqitje të përbashkët gjatë fushatës zgjedhore të nënpresidentit të SHBA-së.

Dy burime të njohura me ngjarjet në kampin e Obamës thanë gjithashtu se gruaja e tij Michelle Obama gjithashtu mbështet kandidaturën e Harris.