Disa javë më parë, autoritetet amerikane u njoftuan se ekzistonte një komplot nga Irani për të eliminuar Donald Trump. Kjo çoi në rritjen e sigurisë ndaj ish-presidentit dhe Shërbimi Sekret shtoi masat për të garantuar mbrojtjen e jetës së Trump. Më pas, kur atentati ndaj tij ndodhi në Pensilvani, ku një 20-vjeçar qëlloi drejt ish-presidentit, duke e lënduar në veshin e djathtë, u ngritën shumë dilema mbi funksionalitetin dhe gabimet e Shërbimit Sekret.

Ndonëse CNN thekson se atentatori 20-vjeçar, i identifikuar si Thomas Matthew Crooks dhe i ekzekutuar në vendngjarje, nuk ka lidhje të dukshme me komplotin iranian, sërish fakti që ka pasur një kërcënim të tillë dhe sërish, Trump u lëndua, tregon se diku Shërbimi Sekret ka gabuar. Një zyrtar amerikan i Sigurisë Kombëtare, bëri me dije se Shërbimi Sekret dhe stafi i fushatës së Trump ishte në dijeni të kërcënimit, para tubimit që solli atentatin ndaj ish-presidentit.

“Shërbimi Sekret mësoi për kërcënimin në rritje. Në përgjigje të kërcënimit, Shërbimi Sekret rriti burimet dhe asetet për mbrojtjen e ish-presidentit Trump. E gjithë kjo ndodhi para së shtunës”, u shpreh zyrtari për CNN.

Deri më tani, skuadra e Trump nuk ka reaguar për kërcënimin e Iranit, me arsyetimin se nuk mund të komentojnë detajet e sigurisë së ish-presidentit dhe se për to, është përgjegjës Shërbimi Sekret.

Nga ana tjetër, thuhet se Shërbimi Sekret i ka vënë në dijeni anëtarët e stafit dhe i ka paralajmëruar të mos mbajnë mitingje në natyrë dhe ambiente të hapura, pasi rreziku është më i lartë se në mjedise të mbyllura, ku mund të kontrollohet më mirë situata.

Misioni i Përhershëm i Republikës Islamike e Iranit në Kombet e Bashkuara mohoi të ketë pasur një komplot të tillë për të eliminuar Trump. Ai i quajti akuzat të pabaza dhe me qëllime të këqija.

“Nga këndvështrimi i Republikës Islamike të Iranit, Trump është një kriminel që duhet të ndiqet penalisht dhe të dënohet në një gjykatë për urdhërimin e vrasjes së gjeneralit Soleimani. Irani ka zgjedhur rrugën ligjore për ta sjellë atë përpara drejtësisë”, u shpreh në një deklaratë Misioni.

Sa i përket gjeneralit të përmendur, bëhet fjalë për Qasem Soleimani, një komandant i lartë i Gradës Revolucionare Islamike të ushtrisë së Iranit. Ai u vra nga një sulm ajror i SHBA në aeroportin e Bagdadit, 4 vjet më parë.

Që prej asaj ngjarjeje, Irani shpesh ka thënë se do të hakmerret për vrasjen e tij. Sipas Departamentit të Drejtësisë, komplotet iraniane kanë pasur disa shënjestra, duke nisur që nga John Bolt, këshilltar i Trump për Sigurinë Kombëtare; e deri tek ish-sekretari i shtetit, Mike Pompeo. Si rrjedhojë e rrezikshmërisë së lartë, edhe Robert O’Brien, ish-këshilltari i Trump për Sigurinë Kombëtare, shtoi masat e sigurisë.

Shqetësimi për një atentat të mundshëm ndaj Trump dhe/ose ish-anëtarëve të qeverisë së tij nga komplotet iraniane ka qenë goxha prezent për SHBA-në. Rishtazi, inteligjenca amerikane ka thënë se rreziku është edhe më i lartë.

Ndërkohë, vijojnë hetimet për atentatin ndaj Trump. Deri më tani, nuk është gjetur një lidhje mes atentatorit dhe ndonjë bashkëpunëtori amerikan apo të huaj.