Nga Lauren Fedor, Financial Times

Kur Donald Trump pranoi për herë të parë kandidimin nga partia e tij për president në Konventën Kombëtare Republikane në vitin 2016, gruaja e tij, Melania, mbajti një fjalim në mbështetje të burrit të saj.

Katër vjet më vonë në mes të pandemisë së Covid-it, ajo bëri të njëjtën gjë, me fjalimin që e mbajti në Kopshtin e Trëndafilave të Shtëpisë së Bardhë.

Por këtë javë, teksa burri i saj përgatitet të pranojë kandidimin e Partisë Republikane për president për herë të tretë në konventën e partisë në Milwaukee, mungesa e saj ka rënë dukshëm në sy.

Profili i ulët i Melania është pjesë e një ndryshimi të dukshëm brenda familjes së ish-presidentit që tashmë ka filluar të shfaqet në publik në konventën republikane.

Gjithashtu, në festime mungojnë vajza e tij Ivanka dhe bashkëshorti i saj Jared Kushner, të cilët ishin ndihmës kryesorë në Shtëpinë e Bardhë të Trump-it. Nga ana tjetër, djali i tij më i madh Donald Jr, i cili është popullor në mesin e bazës populiste të babait të tij, ka qenë i kudondodhur në Milwaukee dhe do të flasë para kandidatit për zëvendëspresident JD Vance. Të dy dihet se janë miq të ngushtë dhe të besuar.

Zyrtarët e fushatës së Trump-it kanë këmbëngulur se ish-zonja e parë, e cila është larguar nga publiku që kur burri i saj u largua nga Shtëpia e Bardhë, do të paraqitet në konventë më vonë gjatë javës. Ajo gjithashtu bëri një deklaratë të rrallë publike në fundjavë pas atentatit të mbetur në tentativë ndaj bashkëshortit të saj, duke bërë thirrje për unitet kombëtar dhe shërim.

Por ajo nuk do të flasë në skenë dhe të martën mbrëma, ishte një e sapoardhur relativisht e re në panteonin trumpian, nusja e presidentit, Lara Trump, e cila mbajti fjalimin kryesor në vendin e rezervuar historikisht për gruan e kandidatit për president që ka për qëllim të humanizojë kandidatin.

“Kur shoh Donald Trump-in, shoh një baba të mrekullueshëm, vjehrrin tim dhe gjyshin e dy fëmijëve të mi”, tha Lara në fjalimin e saj. “Ky është një njeri që ka sakrifikuar për familjen e tij dhe një njeri që ka sakrifikuar vërtet për vendin e tij.”

Si njerka e saj, edhe Ivanka pritet të dalë në kongres. Por ajo nuk është planifikuar të flasë dhe mbetet e paqartë nëse ajo apo Kushneri, i cili ka kaluar katër vitet e fundit duke u përqendruar në firmën e tij të investimeve, e cila mori një injeksion prej 2 miliardë dollarësh nga fondi i pasurisë sovrane saudite vetëm gjashtë muaj pasi Trump u largua nga Shtëpia e Bardhë, do të kërkojë një rol më të madh në fushatë, ose në një administratë të dytë Trump.

“Këtë herë, unë po zgjedh t’u jap përparësi fëmijëve të mi të vegjël dhe jetës private që po krijojmë si familje,” tha Ivanka në një deklaratë pasi babai i saj njoftoi kandidimin e tij të tretë për në Shtëpinë e Bardhë. “Unë do ta mbështes gjithmonë babanë tim, por në vazhdim do ta bëj këtë jashtë arenës politike.”

Kate Andersen Brower, një autore e disa librave për Shtëpinë e Bardhë, duke përfshirë First Women, tha se ishte “shumë e pazakontë” që bashkëshortja e një kandidati të mos fliste në një konventë, por Melania, e cila u akuzua se kopjoi Michelle Obamën në fjalimin e saj në konventën e vitit 2016, “ndoshta e sheh këtë si një situatë ku ka më shumë për të humbur sesa për të fituar”.

“Ata kishin nevojë dëshpërimisht për një përfaqësuese grua nga familja Trump për ta zënë atë rol”, shtoi Brower. “Lara mund ta mbushë atë boshllëk.”

Ishte si një moment debutues për Larën, 41-vjeçarja ish-producente e televizioneve tabloide, e cila është e martuar me Eric Trump-in dhe në fillim të këtij viti u bë bashkëkryetare e Komitetit Kombëtar Republikan me kërkesë të vjehrrit të saj.

“Donald Trump është mbështetur gjithmonë shumë në familjen e tij dhe do të vazhdojë ta bëjë këtë,” tha Mick Mulvaney, i cili ishte ushtrues detyre i shefit të kabinetit të Shtëpisë së Bardhë të Trump-it nga vitin 2019 deri në vitin 2020. “Mund të jenë anëtarë të ndryshëm të familjes në mandatin e dytë… por fëmijët e tij do të jenë gjithmonë këshilltarët e tij të lartë.”

Ndryshimi delikat brenda familjes u shfaq gjatë natës së parë të kongresit, kur ish-presidenti bëri një paraqitje surprizë në arenë dhe u ul pranë Donald Jr dhe Eric-ut në një lozhë VIP. Ata ishin të rrethuar nga partneret e tyre, Kimberly Guilfoyle dhe Lara Trump, si dhe motra e tyre më e vogël, Tiffany Trump dhe bashkëshorti i saj, Michael Boulos.

Nëse Ivanka dhe Jared-i ishin përfaqësues të asaj që disa në botën e Trump-it i quanin me tallje “globalistët”, ishte e vështirë të mos vërehej një imazh shumë i ndryshëm rreth familjes së parë në lozhën VIP: ish-personaliteti i Fox News dhe provokatori i djathtë Tucker Carlson ishte ulur gjithashtu atje, bashkë me aleatët besnikë të kongresit, si kongresmeni nga Florida, Byron Donalds dhe kryetari i Dhomës së Përfaqësuesve, Mike Johnson.

Mulvaney pranoi se Ivanka dhe Jared-i përfaqësojnë elementë më “centristë” të partisë republikane, sesa fraksionet e krahut të djathtë më populistë të mishëruar nga Donald Jr dhe Vance.

Madje, asgjë nuk simbolizon epërsinë e Donald Jr më shumë sesa përzgjedhja e Vance-it. Të dy ishin miq të ngushtë dhe flasin ose shkëmbejnë mesazhe pothuajse çdo ditë, sipas një personi që e njeh marrëdhënien e tyre. Donald Jr dhe e fejuara e tij, Guilfoyle, kanë luajtur gjithashtu një rol aktiv në mbledhjen e fondeve për fushatën.

Brower tha se mungesa e Ivankës dhe Melanias nga linjat e frontit në Milwaukee ishte një shenjë e pasojave që kanë pasur dy anëtarët e familjes nga presidenca e parë e Trump-it.

“Ka shumë vraga për gratë Trump,” tha Brower. “Ivanka u kritikua nga shumë demokratë, të cilët mendonin se ajo do të ishte dikush që mund ta zbuste babanë e saj në Shtëpinë e Bardhë, por nuk mundi. Ose nuk donte, ose nuk mundi.”

Pavarësisht nga pasojat në familjen e tij, Mulvaney thotë se ai pret që një administratë e dytë e Trump-it të vazhdojë praktikën e tij të pazakontë të vendosjes së anëtarëve të familjes në politikat dhe pozicionet kryesore politike.

“Kandidati presidencial gjithmonë duhet të vendosë vulën e tij në partinë kombëtare,” tha Mulvaney. “Kushdo që habitet nga vendosja e anëtarëve të familjes së tij në poste kyçe nga Donald Trump-i, nuk e njeh Donald Trump-in”.

“Ndonjëherë, të vetmëve njerëz të cilëve mund t’u besosh janë familja,” i tha Lara Trump The Washington Post në një intervistë të fundit. “Për [Donald Trump-in], ka qenë pikërisht kështu, për fat të keq, madje shpeshherë.”