Partia Laburiste ka fituar thellë zgjedhjet në Mbretërinë e Bashkuar, duke marrë pushtetin pas 14 viteve në opozitë. Sir Keir Starmer do të jetë kryeministri i ri i vendit. Liderë nga mbarë bota kanë nisur ta urojnë për detyrën. 

Rishi Sunak ka thënë se pranon përgjegjësinë për humbjen historike të Partisë Konservatore,  e cila siç treguan sondazhet përgjatë fushatës, thuajse u “shkërmoq” duke humbur edhe vendin e dytë në shumë prej zonave zgjedhore. 

Laburistët do të formojnë qeverinë e ardhshme, me një shumicë prej 211 ulësesh.

Sunak u tha mbështetësve: “Populli britanik ka dhënë një verdikt të rëndë sonte, ka shumë për të mësuar… dhe unë marr përgjegjësinë për humbjen.” Ai pritet të japë dorëheqjen, duke i hapur rrugë zgjedhjes së një lideri të ri për konservatorët. 

Konservatorët kanë marrë rezultatin më të keq në historinë e tyre. Ata kanë humbur më shumë se 250 mandate dhe do të mbeten me vetëm 121 deputetë.

Ndërsa kryeministri i ri, nuk e fshehu entuziasmin. Sir Keir tha “ndryshimi fillon tani”, duke shtuar “ndihem mirë, duhet të jem i sinqertë” dhe “vendi po zgjohet me rrezet e shpresës”. 

Lideri i forcës populiste, Reform UK, Nigel Farage fitoi një vend në Parlament në përpjekjen e tij të tetë, në Clacton, duke premtuar “ky është vetëm hapi i parë i diçkaje që do t’ju trondisë të gjithëve”. Reform UK ka katër deputetë deri tani dhe ka gërryer kryesisht Partinë Konservatore. 

Po kështu një rezultat pozitiv duket edhe për Liberal Demokratët, që mbërrijnë në kuotat e 71 deputetëve. 

Partia Kombëtare Skoceze ka patur një rezultat zhgënjyes. Deri tani parashikohet të reduktohet në vetëm nëntë deputetë, ndërsa Laburistët rimarrin dominimin në Skoci.

Disa figura qëndrore të konservatorëve kanë humbur mandatin, përfshirë ish Kryeministren Liz Truss, Sekretarin e Mbrojtjes, Grant Shapps dhe lideren e Commons, Penny Mordaunt. 

Ish-lideri i Laburistëve, Jeremy Corbyn, ka mposhtur partinë e tij të vjetër për të ruajtur mandatin e tij në Islington North si kandidat i pavarur.