Këngëtarja me origjinë shqiptare Rita Ora është rikthyer me muzikë të re. 33-vjeçarja, publikoi të premten një videoklip për këngën “Ask & You Shall Receive”.

Videoja “Ask & You Shall Receive” tregon Ritën duke marrë nën kontroll një lavanderi, ku ajo shkatërron vendin me një shkop dhe merr çantat e saj me para. Regjisori i videos është Dano Cerny.

“Ask & You Shall Receive është PUBLIKUAR TANI! Një BOP veror, shkruar nga një prej artisteve/ mbështetëseve/ motrave të mia të preferuara @raye” shkroi Ora në Instagram. “Në këtë video, ne vendosëm zemrën, shpirtin, gjakun, për një nga xhirimet më ambicioze, sfiduese dhe kreative që kam qenë ndonjëherë pjesë. Faleminderit çdo personi që e solli në jetë këtë krijim, me shpresën se edhe ju do ta doni atë.”

“Ask & You Shall Receive” pritet të shfaqet në albumin e katërt të ardhshëm të Orës. Këngëtarja publikoi albumin e saj më të fundit, You & I, në korrik 2023.