Kreu i grupi parlamentar të PD, Gazment Bardhi ka deklaruar se Olsi Rama, vëllai i kryeministrit Edi Rama, është i përfshirë në laboratorin e drogës në Xibrakë.

I ftuar në studion e “Opinion”, Bardhi u shpreh se ka një analizë të mbështetur në dokumente për këtë dhe se mund t’i nxjerrë shumë shpejt.

Biseda:

Blendi Fevziu: Këtu në studio keni deklaruar, edhe pse zhvillimet herë pas here nuk na kanë lejuar që të kthehemi, keni deklaruar që keni një material të madh, një zbulim të rëndësishëm që lidhet me një komision hetimor që nuk ju lejohej nga mazhoranca. A mund të më thoni për çfarë bëhet fjalë?

Gazment Bardhi: Së pari, komisioni bëhej fjalë për atë TIMS, se për çfarë bëhet fjalë ju kam vënë në dispozicion materialet.

Blendi Fevziu: Jam gati ta bëj emisionin për këtë, por kanë ndodhur zhvillime që jemi detyruar të merremi me rendin e ditës. Përse bëhet fjalë? Kush akuzohet me këtë?

Gazment Bardhi: Bëhet fjalë për një aferë ku është i përfshirë i vëllai i kryeministrit.

Blendi Fevziu: Në çfarë pozite?

Gazment Bardhi: Ka qenë i përfshirë në laboratorin e drogës në Xibrakë.

Blendi Fevziu: Po në çfarë roli?

Gazment Bardhi: Pastaj e dogjëm denoncimin. A do të më ftosh javën tjetër?

Blendi Fevziu: Po, të ftoj javën tjetër. A e keni hamendje, e keni analizë, apo e keni të mbështetur në fakte?

Gazment Bardhi: E kam analizë të mbështetur në dokumenta. Jam i gatshëm, nesër, të hënën, të martën, kur ju të dëshironi…

Blendi Fevziu: Jeni i sigurtë që janë fakte?

Gazment Bardhi: Po, janë fakte.

Blendi Fevziu: Javën tjetër unë po ju ftoj për këtë çështje.