Endri Shabani, kryetar i Nisma Thurje, ka deklaruar në emisionin “Të Paekspozuarit” në MCN TV, se ai në zgjedhjet e vitit 2021, ka marrë më shumë vota personalisht se Sali Berisha në qarkun e Tiranës. 

“Sali Berisha ka marrë personalisht më pak vota seç kam marrë unë në Tiranë. Merri votat personale të 2021 të Sali Berishës dhe krahasoji. Sali Berisha vota personale, me lista të hapura në Tiranë, hape tani rezultatin ka marrë më pak se Nisma Thurje!“, deklaroi Shabani në TPZ. 

Në fakt, rezultatet e publikuara nga KQZ, tregojnë se Berisha ka marrë disa herë më tepër vota se Endri Shabani, madje edhe se i gjithë subjekti politik që ai përfaqëson në Tiranë. 

Konkretisht, Shabani ka marrë vetëm 751 vota në Tiranë, ndërsa Berisha ka arritur të sigurojë 6772 vota personale. 

E gjithë partia “Nisma Thurje” ka marrë në Tiranë vetëm 3937 vota, pra thuajse gjysma e votave personale të Berishës. 

Për një një politikan “fringo” të ri dhe të panjohur, sigurisht nuk është turp të marrë pak vota, por është turp të gënjejë publikisht. 

Rezultatet e zgjedhjeve të 2021 në Tiranë – Burimi: KQZ