Një vinç i madh dhe panelet e drurit lajmëruan nisjen e vendosjes së instalacionit me vlerë 4 milionë euro në oborrin e brendshëm të selisë së qeverisë shqiptare.

Instalacioni do të kushtojë 4 milionë euro dhe tenderi është zhvilluar nga Fondi Shqiptar i Zhvillimit, ku fituese është shpallur kompania “Fusha”.

Sipas të dhënave zyrtare, rezultati i tenderit me objekt “Instalacion me strukturë druri në oborrin e brendshëm të Kryeministrisë, “Parku Eden”’ dhe me fond limit mbi 430 milionë lekë të reja, duhet të shpallej në datën 19 Tetor 2022, por në faqen zyrtare të Agjencisë së Prokurimit Publik, në krah të këtij tenderi u vendos shënimi “Pezulluar”, për t’u rihapur më vonë.

Tenderi i shpallur nga Fondi Shqiptar i Zhvillimit për ndërtimin e instalacionit prej druri shkaktoi reagimin e menjëhershëm publik dhe të opozitës, ndërsa Rama deklaroi se sa i përket instalacionit prej druri “nuk bëhej fjalë për një vepër arti, por një projekt energjie të rinovueshme vetëm për mjedise pune”.

Në fund të Gushtit 2022, Fondi Shqiptar i Zhvillimit shpalli tenderin “Instalacion me strukturë druri në oborrin e brendshëm të Kryeministrisë, “Parku Eden””, me fond limit 431 milionë lekë të reja ose rreth 4 milionë euro.

Për realizimin e këtij tenderi, Fondi Shqiptar i Zhvillimit u ngarkua nga Qeveria, nëpërmjet një vendimi të posaçëm, të miratuar në 27 Korrik 2022.

Projekti parashikon ndërtimin e një strukture prej druri 4-katëshe, e cila do të vendoset në oborrin e pasmë të godinës së Kryeministrisë.

Hartuesit e tij mendojnë se “qëllimi i projektit është krijimi i një objekti qendror, për të cilin do t’ia vlejë që grilat përreth të hapen dhe pamja, aromat dhe oksigjeni që do të çlirohet nga bimësia e dendur do të depërtojë në zyrat e këtij institucioni të rëndësishëm”.

Projekti u realizua nga studio austriake “Precht”, por nuk ka të dhëna sa është paguar ajo.

Sipas opozitës instalacioni, që do të vendoset në oborrin e brendshëm të Kryeministrisë, i “kopështi i Parajsës”, përveç kostos së pajustifikuar, është edhe një tallje e hapur me shqiptarët, sepse kryeministri normal i një vendi normal nuk do të shpenzonte kurrë 4 milionë euro për një instalacion, një tekë të vetën, të cilën ai do ta fotografojë dhe postojë në rrjete sociale si Rilindje urbane.