Kryetari i Partisë Demokratike, Lulzim Basha ka zhvilluar një takim me qytetarët në njësinë nr. 4 në Tiranë.

Fillimisht ai u ndal në zonën e “Oxhakut” dhe pranë shkollës “Bajram Curri”, ku u takua me qytetarë, tregtarë dhe sipërmarrës të kësaj zone, me të cilët ka diskutuar mbi gjendjen ekonomike dhe politike të vendit.

Ai u njoh me problematikat e tyre të shumta. Rritja e çmimeve, rritja e taksave dhe tarifave, rënia e fuqisë blerëse, papunësia e lartë, e ka vështirësuar jetën e tyre, sidomos te pensionistëve.

“Paratë që duhet të shkonin te qytetarët sot përfundojnë në xhepat e një grushti oligarkësh të lidhur me qeveritarët”, theksoi Basha, ndërsa shtoi se “ekonomia sot është e kapur nga interesat e një grupi të ngushtë, të lidhur më zyrtarë të korruptuar dhe nuk ju ofron atyre mundësitë që meritojnë”.

“Ne e mbështesim dhe inkurajojme SPAK t’i japë fund pandëshkueshmërisë në nivele të larta dhe kërkojmë që të mos ketë asnjë imunitet për parlamentarët dhe qeveritarët që hetohen nga SPAK”, u shpreh kreu demokrat.

Qytetarët kanë mirëpritur edhe propozimin e bërë nga PD për lista të hapura dhe vetingun e politikaneve.

“Është koha që qytetarët të mësojnë se kush janë politikanët e korruptuar dhe që ata vete të zgjedhin deputetin e tyre dhe shqiptarët që jetojnë jashtë vendit, të cilët japin një kontribut të madh për vendin të kenë mundësi të votojnë në zgjedhje nga aty ku jetojnë, presidenti të zgjidhet drejtpërdrejt nga populli”, tha Basha.