Taulant Balla duket se ka harruar detyrën e ministrit të Brendshëm dhe ka filluar të merret me zjarret që ndodhin në vend duke informuar qytetarët për situatën rreth tyre.

I fundit ishte zjarri në pyllin me pisha në Laç të cilin Balla e cilëson se një ndër situatat më të vështira të krijuar nga zjarret gjatë këtij viti.

Më tej, ministri i Brendshëm i Ramës merr edhe rolin e policit duke njoftuar se efektivët kanë arrestuar në flagrancë një prej autorëve të kësaj zjarrvënie, i cili është 41-vjeçari V. H.

“Zjarret në vend-Në Bashkinë Kurbin, në masivin me pisha pranë qytetit të Laçit, kemi një ndër situatat më të vështira të krijuar nga zjarret gjatë këtij viti. Ndërsa forcat zjarrëfikës të gjitha bashkive pranë Kurbinit janë urdhëruar të ndërhynë, edhe Emergiencat Civile, Forcat e Armatosura dhe Forcat e Ndërhyrjes së Shpejtë janë nisur për në Laç. Policia e Shtetit ka ndalur në flagrancë njërin nga autorët e kësaj zjarrivënie (shtetasi V.H. 41 vjeç).”, shkruan Balla.

Mirëpo a është kjo vërtetë detyra që i takon ministrit të Brendshëm?

Në një kohë kur skandalet në polici kanë pushtuar vendin, Balla gjen kohë të hallakatet.

Vetëm pak ditë më parë një efektiv policie u arrestua pasi shpërndante drogë në lokalin e tij në Sarandë. Disa ushtarakë u arrestuan gjithashtu pasi kishin kthyer repartin e ushtrisë në “shtëpi bari”.

Nga ana tjetër, çdo ditë e më shumë po ndodhin aksidente të ndryshme dhe në lidhje me këtë situatë nuk merret asnjë masë.

Në një kohë kur bosët e krimit enden të lirë, Balla ka kohë të ndërrojë ministri e të kalojë te ajo e Mbrojtjes duke njoftuar situatën e zjarreve dhe terrenin e vështirë që hasin zjarrëfikësit.