Dihet kush është mburrur me koncesionin e sterlizimit, është kryeministri aktual

Arrestimet për “Sterilizimin”, Meta: Drejtësi me regji, Rama është mbi ligjin

Kryetari i Partisë së Lirisë, Ilir Meta tha se kryeministri Rama ishte ai që u mburr me koncesionin e sterilizimit.

I ftuar në News 24, Meta u pyet për ish-zv.ministrin e Shëndetësisë, Klodian Rjepaj, i cili u arrestua sot dhe që më parë ka qenë ish-funksionar i LSI. Meta tha se ka kohë që nuk e mban mend si njeri aktiv në LSI.

Meta: Dihet kush është mburrur me koncesionin e sterlizimit, është kryeministri aktual. Bashkë me ministrin e Shëndetësisë së asaj kohe bënë atë që një investim i shkëlqyer i fjalës së fundit, të shkencës dhe teknologjisë, që ishte inauguruar që në 2011, nuk e konsideruan fare dhe paraqitën një situatë problematike që të realizonin këtë koncesion. Ishte i panevojshëm dhe spekulativ. Të gjithë personat e tjerë që kanë një problem në këtë hetim, marrin përgjegjësitë e tyre. Ka shumë kohë që nuk e mbaj mend këtë person si një njeri aktiv të LSI-së.

Kreu i PL-së shtoi se e gjitha është një drejtësi me regji nga Edi Rama.

Meta: Që është drejtësi me regji është e padiskueshme. Që është një person mbi ligjin dhe drejtësinë aktuale, përmes gjithë zbatimit anti kushtetues të ndryshimeve kushtetuese, kjo është shumë e qartë.