Deputeti i Partisë Demokratike, Ferdinand Xhaferaj komentoi operacionin policer në sajë të të cilit zbuloi një parcel kanabisi në territorin e repartit ushtarak në Zall Herr në Tiranë, por edhe arrestimin e zyrtarëve në kuadër të operacionit të koduar “Metamorfoza”.

Në një postim në rrjetete sociale, sipas Xhaferrajt, ‘droga po pushton edhe bastionin e fundit në Shqipëri, ushtrinë’.

Postimi i plotë:

Droga pushton bastionin e fundit në Shqipëri, ushtrinë!

Trafiqet dhe korrupsioni kanë minuar gradualisht të gjitha institucionet shqiptare duke zhbërë turpshëm asistencën ndërkombëtare për ndërtimin e shtetit ligjor në Shqipëri, ndërsa dosja e SPAK “Metamorfoza”, ku kupola e Policisë ishte vënë në shërbim të krimit, e konfirmon më së miri këtë.

Por, sëfundmi u konstatua se edhe infrastruktura e ushtrisë, bastioni i fundit ku mendohej se ndërkombëtarët kishin implementuar një standard perëndimor të funksionimit, po përdoret për kultivimin e kanabisit.

Të gjithë mund të pyesin se, si është e mundur që ushtria shqiptare, aq shumë e përfshirë në trajnime, asistence dhe bashkëpunim me ushtritë e vendeve të tjera anëtare të NATO-s, të përfshihet në kultivimin e kanabisit?

Përgjigjja gjendet tek një shprehje e njohur në romanin “Dhe Lind Dielli” të Ernest Hemingëay, kur një nga personazhet, i quajtur Mike Cambell, u pyet se si falimentoi, ai dha përgjigjen: “Në dy mënyra, gradualisht pastaj menjëherë”.

Duket se sipas së njëjtës skemë po falimentojnë edhe investimet ndërkombëtare për stabilitetin e gënjeshtërt në Shqipëri.

Është fakt i ditur se regjimet despotike mund të prodhojnë vetëm ‘paqen e varrezave’ ku dhuna për të imponuar heshtjen janë parimi dhe qëllimi i regjimit.

Dhuna brutale e Rrahjeve në Fushë-Krujë apo e shoqëruesit të Kryetares së Kuvendit në Sukth, të Durrësit, janë edhe evidenca më e fundit.

Të gjithë duhet të bëjmë kujdes sepse Shqipëria po marshon drejt skemës: Gradualisht, pastaj menjëherë!