Vendi drejt falimentimit, pensionistët në krye të punësimit!

Nga Sali Berisha

Vendi drejt falimentimit! Pensionistët në krye të punësimit!

Anketa e forcave të punës e INSTAT-it tregon se Shqipëria po ecën e sigurtë drejt falimentimit në tregun e punës.

Tremujorin e parë të ketij viti, sipas këtij studimi, në Shqipëri u punësuan 17 mijë pensionistë, pra qytetarë mbi moshën 65 vjeç. Kurse numri i të punësuarëve të moshës nga 15 në 64 vjeç u ul me 12 mijë veta!

Këto shifra janë dëshmi dramatike e pasojave të politikës genocidale, të përzënies së shqiptarëve nga vendi nga regjimi i Edi Ramës.

Për më shumë, lexoni analizën e gazetarit në portalin “Oligarkia.al”:

INSTAT: Pensionistët, lokomotiva e tregut të punës!

INSTAT: Pensionistët, lokomotiva e tregut të punës!

Anketa e Forcave të Punës, botim, i cili raporton treguesit zyrtarë të papunësisë në Shqipëri është një “thesar” statistikor. Konsideroni vetëm dy tregues.

Sipas Institutit të Statistikës, në tremujorin e parë të vitit numri total i të punësuarve në Shqipëri u rrit me 5 mijë veta. Për të njëjtën periudhë, numri i të punësuarve me moshë nga 15 deri në 64 vjeç u ul më 12 mijë veta.

Çfarë do të thotë kjo? Që në tremujorin e parë të vitit Shqipëria punësoi 17 mijë pensionistë me moshë mbi 65 vjeç. Me këtë panoramë, që raportojnë shifrat zyrtare të papunësisë, lokomotiva e rritjes së punësimit në Shqipëri rezultojnë pensionistët.

Por nuk mbaron këtu. Pjesa dërrmuese e rënies së punësimit në moshat 15-64 vjeç erdhi nga të rinjtë. Sipas INSTAT, në tremujorin e parë të vitit, numri i të punësuarve me moshë 15-29 vjeç u ul me 11.5 mijë veta duke rënë në 264 mijë veta nga 274.5 mijë që ishte në tremujorin e fundit të vitit të kaluar.

Pra të rinjtë, ata që janë mosha më vitale ekonomikisht, kanë humbur masivisht vendet e punës. Por në rang të përgjithshëm punësimi është rritur nga armata e pensionistëve, të cilët rezultojnë se po udhëheqin rritjen e punësimit në ekonomi.

Me pak fjalë, të gjithë pensionistët në punë. Tani presim që INSTAT të raportojë sektorët nga erdhi rritja e punësimit. Sepse me këto statistika, nuk do ishte çudi më edhe po të dilte se rritja e punësimit erdhi nga sektori i IT-së apo industria aeronautike.