Tre policë kufitarë të Kosovës, janë rrëmbyer këtë të mërkurë, nga forcat serbe. Lidhur me rastin ka reaguar edhe kryetari i FRPD-së Besart Xhaferri.

Xhaferri shprehet se ky rrëmbimi i policëve tregon se Kosovës i kanoset rrezik i madh.

Përmes një postimi në rrjete sociale, Xhaferri shkruan se pas bojktotit të mbledhjes së dy qeverive Shqipëri-Kosovë, nga kryeministri Rama, Vuçiç ka shtuar dozën e presionit, duke autorizuar kështu rrëmbimin e tre efektivëve.

Ndër të tjera Xhaferri shkruan se ‘ky akt i rëndë i Serbisë minon çdo tentativë dialogu mes Prishtinës dhe Beogradit, e liderët e BE dhe SHBA duhet të reagojnë ashpër’.

Postimi i plotë:

Një ditë pasi Edi Rama mori vendimin arbitrar për të bojkotuar mbledhjen e përbashkët të dy qeverive që do të mbahej në Gjakovë, duke i vendosur de fakto sanksione  Kosovës, Aleksandër Vuçiç ka shtuar dozën e presionit, duke autorizuar rrëmbimin e tre efektivëve të policisë së Kosovës.

Efektivët Rifat Zeka, Beqir Sefi dhe Mustafë Shemi, pjesëtarë të Policisë së Kosovës janë rrëmbyer nga njësiti “Cobra” të xhandarmërisë serbe dhe  janë nisur drejt Beogradit dhe pak dihet aktualisht për fatin e tyre.

Rrëmbimi i tyre ka ndodhur në brendësi të territorit të Republikës së Kosovës mesditën e kësaj të Mërkure.

Ky akt i rëndë i Serbisë minon çdo tentativë dialogu mes Prishtinës dhe Beogradit, e liderët e BE dhe SHBA duhet të reagojnë ashpër.

Klasa politike në Shqipëri dhe Kosovë, por dhe faktori politik shqiptar në Maqedoni të Veriut dhe Mal të Zi  duhet të solidarizohet me Prishtinën Zyrtare dhe betejën e saj me hijet e zeza të Serbomadhisë, që kërcënojnë stabilitetin e mbarë Ballkanit.