Kosova feston sot 24 vite nga çlirimi i njësive ish-jugosllave. Edhe në Ditën e Çlirimit, kryeministri Edi Rama nuk është druajtur t’i drejtojë kritika Albin Kurtit, për situatën në veri të Kosovës.

Në një postim në Twitter, ku Rama uron Ditën e Çlirimit, shkruan se pikërisht sot është dita që Kosova të reflektojë për grindjen absurde me aletatët strategjikë, siç është SHBA-ja.

Rama shton se Kosova mund të dalë nga qorrsokaku ku është future, sipas tij, me dialog, me ide konkrete dhe miq të mirë, e jo me propagandë, polica dhe keqtrajtim.

“Si sot e gati çerek shekulli më parë, hyrja e NATO-s në Kosovë u rikujton të gjithëve, se pa aleatët strategjikë të shqiptarëve, miq të mirë në ditët më të këqija, s’do të kishte as Republikë të Kosovës, as liri e demokraci për shqiptarët në Kosovë! Zoti i bekoftë aleatët tanë!

Prandaj bash sot është dita për të reflektuar thellë e për ta nxjerrë Kosovën nga qorrsokaku ku e ka futur grindja absurde me aleatët! Kosova duhet të dalë patjetër prej qorrsokakut me dialog jo me policë,me ide konkrete jo me propagandë, me miq të mirë jo me keqtrajtim të miqve!”, shkruan Rama në Twitter.

Si sot e gati çerek shekulli më parë, hyrja e NATO-s në Kosovë u rikujton të gjithëve, se pa aleatët strategjikë të shqiptarëve, miq të mirë në ditët më të këqija, s’do të kishte as Republikë të Kosovës, as liri e demokraci për shqiptarët në Kosovë! Zoti i bekoftë aleatët tanë! pic.twitter.com/bUWygIJrpK

— Edi Rama (@ediramaal) June 12, 2023

Edhe më herët, Rama ka kritikuar kryeministrin Kurti kur tha se Serbia po bën të njëjtën gjë që ka bërë gjithmonë, ndërsa Kosova po bën një gjë që nuk duhet ta bëjë.

Rama njoftoi të enjten edhe një draft që i ka dorëzuar presidentit francez Emmanuel Macron dhe kancelarit gjerman Olaf Scholz, për Asosacionin e Komunave Serbe që sipas tij do të ndihmojë në dialog. Drafti u përball me kritika si nga Tirana edhe Prishtina, pasi Rama nuk është konsultuar me Kurtin për përgatitjen e tij.