Konsumimi i një diete plot me fruta dhe perime mund t’i japë lëkurës tuaj një shkëlqim të freskët.

Por disa ushqime dhe pije, edhe pse të shijshme, mund të çojnë në krijimin e puçrrave, lëkurës së thatë dhe madje edhe rrudhave.

“Ka disa ushqime ose përbërës që unë rekomandoj t’i reduktoni në dietën tuaj për një shëndet optimal të lëkurës“, thotë dermatologia, nutricionistja dhe zëdhënësja e Fondacionit Britanik të Lëkurës me qendër në Londër, Dr. Thivi Maruthappu.

Ajo ka bërë një listë me pesë artikuj për të cilat sugjeron se mund të shkatërrojnë lëkurën tuaj.

Alkooli i tepërt – Pirja e tepërt e alkoolit jo vetëm që ju shkakton gjendjen ‘hangover’, por ka gjithashtu efekte të dëmshme për lëkurën tuaj.

Efekti diuretik i alkoolit, i cili inkurajon trupin të kalojë më shumë lëngje si urinë, çon në humbjen e lëngjeve dhe lëndëve ushqyese që janë jetike për lëkurën me pamje të shëndetshme.

Si rezultat, lëkura mund të duket e thatë, gri, e fryrë dhe brenda 24 orëve pas konsumimit të alkoolit edhe e rrudhosur për shkak të humbjes së elasticitetit. Për më tepër, alkooli ndez indet e trupit, gjë që çon në skuqjen e lëkurës dhe krijimin e njollave.

Megjithatë, kufizimi i sasisë së alkoolit që pini ose konsumimi i ujit midis pijeve alkoolike mund të ndihmojë në parandalimin e këtyre efekteve, si dhe të gjendjes ‘hangover’.

“Përgjithësisht këshilloj ta mbani alkoolin në minimum aty ku është e mundur, veçanërisht në prag të një ngjarjeje të madhe kur dëshironi që lëkura juaj të duket më e mira”, thotë Dr Maruthappu.

“E di që është e mërzitshme, por me të vërtetë ndihmon me skuqjen, linjat e holla dhe shqetësimet e lëkurës si ekzema dhe rosacea”, shton ajo.

Sheqer i rafinuar

Dihet mirë se ngrënia e tepërt e sheqerit mund të shkaktojë shtim në peshë dhe prishje të dhëmbëve, por konsumimi i shumë fetave të tortës dhe pakove me ëmbëlsira mund të mos bëjë mirë as për lëkurën tuaj.

“Shumë sheqer i rafinuar mund të shkaktojë një proces plakjeje në qelizat e trupit”, paralajmëron Dr Maruthappu.

Ajo thotë: “Sigurisht që ne mund të shijojmë sheqer të rafinuar në formë ëmbëlsirash ose biskotash dhe unë vetë do të dorëzohesha përballë një luge akulloreje. Por sheqeri i tepërt i rafinuar në dietat tona mund të përshpejtojë plakjen e lëkurës përmes një procesi të quajtur glikacion”.

Glikacioni është vendi ku sheqeri në qarkullimin e gjakut lidhet me proteinat dhe yndyrnat për të formuar komponime të dëmshme të quajtura produkte përfundimtare të gligacionit të avancuar (AGEs).

Me kalimin e moshës, këto komponime grumbullohen në dermë – shtresa e dytë e lëkurës – dhe shkatërrojnë kolagjenin, duke shkaktuar një humbje të elasticitetit të lëkurës duke krijuar rrudha.
Për disa njerëz sheqeri gjithashtu mund të shkaktojë puçrra, sipas Dr Maruthappu.

Në vend që të konsumoni ushqime me sheqer, ajo sugjeron të hani disa copëza çokollatë të zezë, e cila përmban antioksidantë që e duan lëkurën, të quajtur akantocianin, të cilët mendohet se luftojnë plakjen e parakohshme të lëkurës.

Qumësht i skremuar

I konsideruar shpesh si opsioni ‘më i shëndetshëm’, qumështi i skremuar mund të jetë fajtor për puçrrat në fytyrë. Edhe pse nuk i prek të gjithë, qumështi me pak yndyrë mund të shkaktojë njolla.

Dr Maruthappu thotë: “Disa kërkime kanë treguar se qumështi i skremuar mund të kontribuojë te krijimi i puçrrave, veçanërisht nëse pini më shumë se disa gota në ditë”.

Një studim i 225 adoleshentëve midis 14 dhe 19 vjeç, i botuar në Journal of American Academy of Dermatology në 2016, sugjeroi se sasia e qumështit me pak yndyrë ose të skremuar të konsumuar nga pjesëmarrësit me akne ishte dukshëm më e lartë se ata pa akne.

Edhe pse nuk ka asnjë provë që skremimi u shkaktoi pjesëmarrësve puçrra fytyre, studiuesit spekuluan se kjo mund të jetë për shkak të hormoneve në qumështin e skremuar.

Dr. Maruthappu këshillon ata që vuajnë nga puçrrat në fytyrë duhet të ndërrojnë qumështin e skremuar me një alternativë të fortifikuar jo qumështore, siç është qumështi i sojës, për katër javë për të parë nëse vërejnë ndonjë përmirësim.

Proteinat pluhur

Mund t’ju ndihmojë të ndërtoni muskuj në palestër, por pluhuri i proteinës mund të jetë një shkaktar për shpërthimet e akneve, thonë ekspertët.

Dr Maruthappu thotë: “Kjo nuk vlen për të gjithë. Por nëse keni parë një shtim të puçrrave që nga fillimi i përdorimit të proteinave pluhur, provoni ta ndërroni me një alternativë me bazë bimore”.

Kjo mendohet të jetë për shkak se proteina pluhur rrit prodhimin e një hormoni të quajtur ‘Faktori i Rritjes 1’, i ngjashëm me insulinën (IGF1), i cili nxit rritjen e kockave dhe indeve.

Por IGF1 mund të jetë gjithashtu një nxitës për aknet dhe lëkurën me vaj, në disa raste. Proteinat pluhur me bazë bimore, megjithatë, nuk e shkaktojnë këtë efekt.

Kafeina e tepërt

Një ose dy filxhanë kafe në ditë është mirë të konsumohen, por nëse keni një varësi serioze nga kafeja, kjo mund të ndikojë në lëkurën tuaj.

Kjo është për shkak se pirja e tepërt e kafeinës mund të shkaktojë plakje të parakohshme të lëkurës. “Kafeina e tepërt mund të kontribuojë në dehidratim pasi vepron si një diuretik, duke bërë që ju të urinoni më shumë”, thotë Dr Maruthappu.

Kafeina gjithashtu mund të rrisë nivelet e kortizolit të hormonit të stresit, i cili mund të kontribuojë në shpërthimet e ekzemës, sipas Dr Maruthappu.

Ajo thotë: “Ndërroni kafenë me çaj jeshil, ajo përmban nivele më të ulëta të kafeinës, përveç komponimeve të jashtëzakonshme antioksidante që mbështesin shëndetin e lëkurës duke neutralizuar radikalet e lira që kontribuojnë në plakjen e parakohshme të lëkurës. Fokusohuni në ushqimet që janë të shkëlqyera për lëkurën tuaj – fruta dhe perime plot ngjyra, drithëra të plota për të mbështetur shëndetin e zorrëve dhe boshtin e lëkurës së zorrëve, farat e arrave dhe yndyrat e shëndetshme nga peshku me vaj për të ndihmuar në mbajtjen e lëkurës të lëmuar dhe të zhdërvjellët”.