Koalicioni opozitar “Bashkë Fitojmë” triumfoi në 7 bashki të vendit: Has, Fushë-Arrëz, Pukë, Mirditë, Memaliaj, Himarë dhe Kavajë.

Kandidimi i PD së Alibeajt i solli humbjen koalicionit “Bashkë Fitojmë”, pasi një pjesë e voatve shkuan për kandidatët e Alibeajt edhe pse në përqindje shumë herë më të vogël se kandidatët e “Bashkë Fitojmë”.

Konkretisht, humbja e shkaktuar nga kandidatët e Alibeajt u vu re në 3 bashki: Këlcyrë, Kuçovë dhe Finiq.

Nëse Lefter Maliqi në Kuçovë me 6.222 vota do të shtonte edhe 739 votat e Ilirjan Koxhajt të Alibeajt, totali do të arrinte në 6.961 vota, duke fituar ndaj Kreshnik Hajdarit me 57 vota diferencë.

Leonidha Hristos i koalicionit “Bashkë Fitojmë” në Finiq mori 1911 vota, por nëse do t’i shtoheshin edhe votat e Leonidha Papas nga PD e Alibeajt (1.705), totali arrinte në 3.616 vota. Kështu, Hristos fitonte me një diferencë prej 1.344 votash ndaj Romeo Çakulit të Minoritetit Etnik grek për të Ardhmen.

Edhe në Këlcyrë, PD e Alibeajt dëmtoi votatat e koalicionit opozitar. Nëse 1.936 votave të Arjan Kasajt do t’iu shtoheshin edhe 137 vota të Adriatik Spahiu, totali arrinte në 2.073 vota dhe arrinte një fitore me 54 vota diferencë nga Klement Ndoni.

Në Mallakastër, Agron Kapllanaj i Alibeajt mori 5789 vota, ndërsa Resmi Shanaj i “Bashkë Fitojmë” 735 vota. Nëse votave të Shanajt do t’i shtoheshin edhe ato të Kapllanajt, fitorja ndaj Qerim Ismailajt do të ishte arritur me një diferencë prej 445 votash.