CNN: Një shpërthim i madh vullkanik në Santorini është çështje kohe, sipas shkencëtarëve

Santorini kujton në çdo cep se shtrihet mbi një vullkan. Bukuria e ishullit grek, siç shkruan CNN, është, në fakt, rezultat i historisë së dhunshme vullkanike të zonës dhe u krijua nga një shpërthim i madh rreth 3600 vjet më parë. Dhe gjeologët paralajmërojnë se është vetëm çështje kohe para se të godasë sërish. Ndërkohë, në vitin 2020, agjencia greke e mbrojtjes civile ka zbuluar tashmë një plan prej 185 faqesh për t’u marrë me pasojat e aktivitetit të mundshëm vullkanik në Santorini.

Santorini është pjesë e Harkut Vullkanik Helen, një nga zonat kryesore vullkanike në Evropë, e cila ka parë mbi 100 shpërthime në 400,000 vitet e fundit. Vullkani më aktiv dhe potencialisht i rrezikshëm nënujor i Mesdheut lindor, Kolumbo, ndodhet vetëm pesë milje në verilindje të ishullit. I zhytur në detin Egje, Kolumbo ka heshtur për gati 400 vjet, por nuk fle. Herën e fundit që shpërtheu, në vitin 1650, vrau 70 njerëz dhe shkaktoi një cunami prej 12 metrash. U regjistruan tërmete të forta dhe pasgoditje, së bashku me gazra toksikë dhe tym. Shkencëtarët e dinë se shpërthimi i Kolumbos mund të shkaktojë dëme serioze, kështu që monitorimi është rritur gjatë 20 viteve të fundit.

Një nga anijet më të mëdha kërkimore amerikane, Jodies Resolution, udhëtoi në Santorini midis dhjetorit 2022 dhe shkurtit 2023. Ekspedita e financuar nga NASA zbuloi se në fund të kraterit Kolumbo “ka një oqean jashtëtokësor me specie që mund të gjenden në planetë të tjerë”. Një studim i fundit ka zbuluar gjithashtu një dhomë magme të pazbuluar më parë – shkencëtarët besojnë se kjo dhomë mund të mbajë çelësin për të kuptuar aktivitetin sizmik në rajon.