Mercedes-Benz prezantoi të martën modelin e ri të fundit të makinës me motor me djegie të brendshme – gjenerata e ardhshme e E-Class, që do të prodhohet në Gjermani dhe Kinë, do të shitet në Europë në tremujorin e tretë të këtij viti.

Modelet e mëpasshme të E-Class do të realizohen në një platformë të përshtatshme për makinat me bateri.

“Të ndërtosh një bateri në retrospektivë është gjithnjë një kompromis” – deklaroi Markus Schaefer, Chief Technology Officer, në një tryezë të rrumbullakët me mediat.

“Kemi një E-Class tërësisht elektrike, dhe është EQE”.

Makina zotëron një “ekran të madh” infotainment në pjesën e parme të saj, një sistem argëtimi për sediljet e pasme dhe një projektim të yllit të Mercedes në dritat e frenave, me mundësi argëtimi të përshtatshme për publikun në tregjet nga Europa, te Koreja e Jugut dhe në Kinë.

Ajo do të shitet në Shtetet e Bashkuara në fund të vitit dhe në Kinë, në fillim të 2024.

Mercedes-Benz synon të shesë ekskluzivisht makina elektrike me bateri në gjithë botën brenda vitit 2030, por ka paralajmëruar se këtë ambicie do të synojë ta bëjë vetëm “aty ku tregjet e lejojnë”.

Megjithatë, në korrik 2021, shtëpia automobilistike deklaroi se do të reduktonte me 80 për qind investimet në motorët me djegie të brendshme dhe në teknologjinë hibride plug-in mes 2019 dhe 2026 dhe do të investonte 40 miliardë euro (44 miliardë dollarë) në elektrifikim mes 2022 dhe 2030.

Edhe shtëpi të tjera automobilistike kanë filluar të japin kambanat e alarmit për “vdekjen” e makinave me motor me djegie të brendshme.

Volkswagen ka njoftuar se Golf 8 do të jetë modeli i fundit me motor me djegie, – një makinë e cila ishte në krye të renditjes së makinave më të shitura në Europë.

BMW i la mundësitë e hapura, duke mos përcaktuar një datë të daljes nga qarkullimi të makinave me motor me djegie. Ajo nuk do të prodhojë më motorë me djegie të brendshme në Gjermani, duke nisur nga 2024, por do të vijojë të prodhojë makina me motorë të importuar diku tjetër.

/ Reuters