Si shkruhet fjala vend, apo vënd ?

Shikoni ç’i “punojnë” fjalës “vend”!

Në xhamin e derës së një bari apo ëmbëltoreje kanë shkruar “Vënd Pune”.

Në tabelat për parkimin e taksive në rrugë apo në sheshe të vogla në qytet shkruajnë: “TAXI 1 Vënd” apo “TAXI 2 Vënde”.Shikojini në fotografitë që po postojmë! Që në hyrje të tekstit “Drejtshkrimi i gjuhës shqipe”, në nenin 1, është shkruar rregulli drejtshkrimor, ku thuhet:Shkruhen me e (dhe jo me ë) fjalët ku kjo zanore është e theksuar dhe ndiqet nga një bashkëtingëllore hundore (m, n, nj). Për shembull:vend, vendës, vendos, vendim, zëvendës, zëvendësoj etj.

Pra, nga sa thamë, tërheqim vëmendjen, si më poshtë:Në rastin e parë ku ishte shkruar gabim “Vënd Pune” duhet shkruar kështu: “Vend pune”. Në rastin e dytë “TAXI 1 Vënd” apo “TAXI 2 Vënde” duhet shkruar kështu:“TAXI 1 vend” apo “TAXI 2 vende”.

Siç e shihni, nuk është vetëm një gabim, pra drejtshkrimi i fjalës “vend”, por ka edhe gabime të tjera, gjë që ua shton edhe më tepër përgjegjësinë atyre që i kanë shkruar kaq keq. Vërtet nuk dinë, po pse nuk pyesin?!