Elizabeth Holmes do të nisë dënimin me 11 vjet burg

Gjykata mohoi kërkesën e themelueses së Theranos për të vazhduar të jetë e lirë, ndërsa apelon dënimin për mashtrim dhe komplot.

Elizabeth Holmes duhet të fillojë dënimin me më shumë se 11 vjet burg më 27 prill. Në urdhrin e tij, gjykatësi Edward Davila tha se Holmes nuk përbën rrezik për komunitetin, por ai hodhi dyshime mbi apelin e saj. Edhe nëse Homes fiton apelin, tha ai, nuk ka gjasa të rezultojë në një ndryshim ose një urdhër për një gjyq të ri, për të gjitha akuzat për të cilat ajo u shpall fajtore.

Holmes u dënua me më shumë se 11 vjet burg nëntorin e kaluar, për mashtrim të investitorëve gjatë drejtimit të startup-it të dështuar të testimit të gjakut, Theranos, i cili dikur vlerësohej në 9 miliardë dollarë. Ish-ylli i Silicon Valley pretendoi se teknologjia mund të diagnostikonte sëmundje vetëm me disa pika gjaku.

Theranos, një bashkim i fjalëve “Therapy” (Terapi) dhe “Diagnosis” (Diagnozë), premtonte që vetëm nëpërmjet një pike gjaku nga një e shpuar pa dhimbje e majës së gishtit dhe nëpërmjet një makinerie, të zbulonte të gjitha sëmundjet e mundshme, të dallueshme nëpërmjet gjakut.

Të gjitha mediat shkruan për të, përfshirë Time, Forbes, New Yorker etj. Holmes kaloi nga një e panjohur në një emër të komentuar në Silicon Valley dhe arriti të grumbullonte miliarda dollarë pasuri duke mashtruar investitorët. Ajo u konsiderua mbretëresha e Silicon Valley-t të dominuar nga burra.

Por hetimet tregun se pas historisë së suksesit të Theranos-it, fshiheshin procedura laboratorike dhe rezultate të dyshimta. Prokurorët e përshkruan atë si një sharlatan të fiksuar pas famës dhe pasurisë.