Anëtarja e Kryesisë së PD, Anila Godole, njëherazi akademike dhe pedagoge ka folur në lidhje me kandidaturat e kësaj force politike për zgjedhjet lokale të 14 majit.

E ftuar në “Debat” nga Alba Alishani në A2CNN, Godole ka sjellë në vëmendje faktin e asaj që ndodhi në mbledhjen e gjatë të Kryesisë sw organizuar nga pala ALibeaj ku u vendos që të kandidonin 20 kandidatë.

Ajo shprehu mosdakordësinë e saj, duke thene se do kishte dashur që të ishin 61 emra, ose përndryshe nuk kishte arsye se përse të mbahej vula nga ata dhe t’i çohej PD-së që ka mbështetjen më të madhe të demokratëve.

“Unë personalisht do kisha dashur 61 kandidatë. Kjo është edhe ajo që kam mbrojtur gjatë javës që shkuar, që kemi pasur debate. Deri tani janë 20, jo 16. Të shpresojmë që do avancojë akoma. Natyrisht që nuk është ajo që pritej nga Partia Demokratike.

Është e trishtueshme. PS e kuptoj që gëzohet nga kjo situatë, por për qytetarët sigurisht që nuk është një lajm i mirë për shqiptarët që të dalin me një opozitë të përçarë dhe në atë gjendje në të cilën ajo është deri më tani.

Siç e thashë, gjatë gjithë kohës ajo që unë kam mbrojtur në Kryesi, aty pashë që pjesa më e madhe e tyre prej kohësh kishin kërkuar kandidimin në 61 bashki, pra me 61 kandidatë. Ajo që vura re ishte se një pjesë e lidershipit nuk ishin dakord me këtë gjë.

Në çastin që partia nuk është përgatitur për “luftë” le të themi, për zgjedhje pra, atëherë nuk është e ndershme që të mbahet vula për të cilën u luftua kaq shumë. Dhe unë i kam thënë këtë fjali: Merreni këtë vulë, shkriheni Partinë Demokratike zyrtare, çojini aty ku siç duket mbase janë shumica e demokratëve”, tha Godole.