Radar
Sulmi me armë në TCH, reagon Berisha: Akt kriminal që dëshmon pasigurinë e plotë në vend
Kryetari i Partisë Demokratike, Sali Berisha, ka reaguar pas sulmit me armë në godinën e Top Channel, ku mbeti i vrarë roja i sigurisë, Pal Kola 60 vjeç.
Berisha dënon aktin kriminal ndaj TCH dhe shpreh ngushëllimet familjes së viktimës. Kryedemokrati shkruan se ngjarja që ndodhi pak pas mesnate, është dëshmi e pasigurisë së plotë në vend.
“Një akt kriminal i shëmtuar.
Sulmohet me armë zjarri Top Channel dhe ekzekutohet në kabinën e tij roja e objektit.
Dënoj me ashpërsinë më të madhe këtë akt të shëmtuar kriminal dhe i shpreh ngushëllimet e mia më të ndjera familjes së viktimës, miqve, të afërmve dhe kolektivit të Top Channel.
Denoncoj këtë akt kriminal, si dëshmi tjetër e dhimbshme e pasigurisë së plotë, që ekziston sot në vend nga vendosja e rendit nga regjimi në duart e krimit”, shkruan Berisha në Facebook.
Nga të shtënat me breshëri kallashnikovi mbeti i vrarë Pal Kola, i cili punonte si roje i sigurisë së godinës në TCH. Në vendin e ngjarjes janë gjetur dhe sekuestruar rreth 25 gëzhoja kallashnikovi.
Një mjet tip “Range Rover”u gjet i djegur në Golem të Kvaajës, me të cilin dyshohet se autorët e ngjarjes kanë lëizur për të kryer krimin. Në brendësi u gjetën edhe dy armë tip kallashnikovi.
