Shifra shokuese kanë ardhur nga bota e kinemasë fundjavën e 19 marsit, kur edhe u publikuan fitimet zyrtare të filmave në tregjet kryesore të ekranit të madh dhe lajmi i keq, është ai se bota e DC vijon të vuajë tepër, për të tërhequr shikuesit.

Ishte e ditur prej fillimit se instalimi i dytë i superheroit Shazam, do të ishte poshtë projektimeve në krahasim me filmin e parë, por që e gjithë fundjava do të ndalej në vetëm 30.5 milionë dollarë fitime në SHBA, kjo nuk ishte e pritur.

Madje, edhe në tregun botëror, performanca ka qenë shumë e ulët, duke e çuar totalin e gjithë tregjeve globale në vetëm 65.5 milionë dollarë.

Një krizë e vërtetë për prodhuesin Warner Bros., i cili në ndryshimet rrënjësore që po ndërmerr, po kalon një fazë, ndër më të errëtat të viteve të fundit.

Shazam në fakt, është një film i ndërtuar jo keq dhe i pëlqyeshëm në thelb, por problemet e krijuara me vijimësinë e botës së DC në ekranin e madh, e kanë ndëshkuar atë.

Në fund të filmit shfaqet edhe Wonder Woman, ndërkohë që sipas vendimit ekzekutiv të James Gunn, ajo nuk do të jetë më pjesë e botës së DC aktualisht. Të paktën, jo e luajtur nga Gal Gadot.

Në parim, as Dwayne Johnson nuk arriti ta shpëtonte DC-në nga dështimi, pasi filmi i tij Black Adam nuk kapi as kuotën e 300 milionë dollarëve të fituar globalisht.

Po ashtu, me dështimin e “Ant-Man” në filmin e tretë të superheroit në vazhdën e universit Marvel, po paraqitet sfidë më vete performanca e mirë e “blockbusters” në sallat e mëdha, ku gjithnjë e më shumë, publiku po preferon të presë daljet e filmave në platforma të transmetimit, për t’i parë në shtëpi.

Përmbajtësisht, nuk ka një “Shazam” këtë herë, pasi skenari nuk ndryshon…mbetet ai i industrisë në lëngim.