Luiz Ejlli është njeriu më i përfolur i momentit, fenomeni i këtij viti, personazhi që po thyen çdo rekord shikueshmërie duke arritur të rrëmbejë vëmendjen e të gjithëve. Kuriozitet të madh ka edhe për familjen e tij, e cila ka qëndruar larg medieve, nisur edhe nga fakti që jetojnë në SHBA. Gjithsesi, përmes një telefonate mamaja e Luizit theu heshtjen pak kohë më parë duke u shprehur që e ndjek të birin dhe se është e lumtur për rrugëtimin e tij, duke theksuar se e gjitha është një lojë dhe si e tillë duhet konsideruar.

Por, fama dhe popullariteti kanë edhe anët e tyre negative. Së fundmi në rrjete sociale po qarkullon një thashethem i rremë sipas të cilit mamaja e artistit ka ndërruar jetë. Për këtë lajm të rëndë, është bërë një reagim publik në llogarinë zyrtare në Instagram të këngëtarit.

“Ju Lutem tregohuni të kujdesshëm! Nuk e kuptoj arsyen e këtyre lajmeve të rënda dhe të rreme. Mami i Luizit gëzon shëndet të plotë. Kjo që bëni nuk është NJERËZORE!”- shkruhet në postimin e publikuar në llogarinë e Luizit në Instagram.

Pak ditë më parë, në një intervistë të dhënë për mediat, dy shokët e Luizit kanë treguar lidhur me komunikimin që kanë pasur me nënën e tij dhe shqetësimin që u ka shprehur.

“Me mamanë e vet flas shpesh. Ajo do vetëm shëndetin e Luizit, pjesa e garës nuk i intereson. Të dalë mirë e shëndoshë thotë. Unë mundohem t’i them që tani Luizi ka marrë të tjera përmasa, nuk i bën përshtypje, vetëm thotë të dalëmirë me shëndet”, tha një prej tyre teksa ishte i ftuar në emisionin “Ftesë në 5”.