Kobe dhe Vaness Bryant me vajzat

Për fotot tronditëse të vdekjes së Kobe Bryant, Los Angeles County pranoi t’i paguante Vanessa Bryant dhe tre vajzave të saj afro 30 milionë dollarë.

Marrëveshja zgjidh çështjet gjyqësore mbi pretendimet e mundshme në lidhje me shpërndarjen e fotografive nga rrëzimi i helikopterit të janarit 2020, në të cilin ylli i basketbollit dhe një nga vajzat e tij vdiqën, së bashku me shtatë të tjerë.

Marrëveshja, sipas The New York Times, përfshin 15 milionë dollarë që një juri i dha Vanessa Bryant në gusht, me fonde shtesë për të zgjidhur pretendimet e mundshme nga vajzat. Fotot shokuese u shpërndanë privatisht nga disa policë dhe zjarrfikës të qarkut. 

“Sot shënon kulmin e betejës së guximshme të zonjës Vanessa Bryant për të kërkuar llogari nga ata që janë përfshirë në këtë sjellje groteske”, tha avokati i saj, Luis Li, në një deklaratë. 

“Ajo luftoi për burrin e saj, vajzën e saj dhe të gjithë në komunitet, familja e të cilëve u trajtua me të njëjtën mungesë respekti. Shpresojmë që fitorja e saj në gjyq dhe kjo zgjidhje do t’i japë fund kësaj praktike.”

Aksidenti që çoi në vdekjen e Kobe Bryant dhe vajzës së tij Gianna ndodhi më 26 janar 2020, kur një helikopter privat i marrë me qira nga ai u rrëzua në kodrat e Calabasas, Kaliforni.

Përplasja mori jetën e nëntë pasagjerëve të helikopterit, përfshirë Kobe dhe vajzën e tij Gianna, të cilët po udhëtonin për në një lojë basketbolli.