Para se të bëhej aktori i famshëm që të gjithë e njohim dhe e duam sot, Bradley Cooper duhej të bënte shumë përpjekje dhe të luante role të ndryshme. Përballë Leonardo DiCaprio-s, që i kishte prekur majat me kohë, gjithçka që mund të ndjente ishte xhelozia. Sot, kjo zili është shndërruar në një lidhje të ngushtë mes 2 aktorëve. Po Bradley nuk e ka kompleks ta tregojë ç`ka ndjerë dikur.

Bradley Cooper e filloi nga zero, por ai u ngrit me shpejtësi në rangun për t’u bërë një nga figurat më të njohura të Hollivudit dhe për të pasur një karrierë fitimprurëse. Përpara se të merrte 7 nominime për Çmimin e Akademisë, Bradley punoi në një larmi disiplinash, duke përfshirë gazetarinë, ndërsa ishte ende në kolegj.

Kur Cooper kuptoi se kishte një talent të lindur për ekranin, ai zgjodhi të ndiqte trajnimin e aktrimit. Cooper fitoi famë për herë të parë në filmin Ëedding Crashers të 2005-ës, i ndjekur nga filma si The Hangover, American Hustle dhe American Sniper. Cooper pastaj, në 2018-ën u bë regjisor i filmit të Lady Gaga, A Star Is Born. Leo vazhdonte të ishte në majë (dhe ende është) që prej kohësh së Titanic.

Pasiguritë dhe xhelozia e Bradley-t

Edhe pse ata kurrë nuk kanë ndarë ekranin bashkë në ndonjë projekt, Cooper ka rrëfyer se dikur e kishte zili suksesin e DiCaprios në fillim të karrierës së tij. Aktori ka folur hapur në disa intervista për arsyet dhe momentin kur DiCaprio e bëri të ndjente zili. Bradley rrëfeu: “Kam punuar si roje gjatë gjithë shkollës së mesme. Më kujtohet si e shoqërova njëherë Leonardo DiCaprion në dhomën e tij. Ishte rreth kohës së Titanikut dhe më kujtohet sesi ky djalë që dukej si një fëmijë, edhe pse ne ishim pothuajse në të njëjtën moshë, ishte kaq i famshëm. Në ato momente mendova sesi isha 3 metra larg nga ky djalë fizikisht, por jetonim në botë të ndara”.

Xhelozia nuk është gjithmonë një emocion negativ dhe mund të na frymëzojë që të punojmë më shumë dhe me këmbëngulje drejt arritjes së qëllimeve tona. Kjo është pikërisht ajo që bëri Bradley për të arritur famën që ka sot.

Për shkak të zinxhirit të ngjarjeve, se të dy janë pjesë e Hollivud sot, Bradley dhe Leonardo janë bërë miq të shkëlqyer.