Foto/ Veshja e famshme e Jennifer Lopez në Grammy që shpiku Google Image Search

Sipas ish-CEO-s dhe kryetarit ekzekutiv të Google, Eric Schmidt, informacionet rreth këtij fustani ishin më të kërkuarat në Google në atë kohë

Fustanin që po ia shihni veshur Jennifer Lopez-it, me siguri ka për të hyrë në historinë e teknologjisë. Më shumë se dy dekada më parë, inxhinierët të frymëzuar nga ky fustan ndërtuan “Google Image Search”.

Ishte ndarja e çmimeve Grammy në vitin 2000, kur fustani i markës Versace, i dizajnuar me gjethe palme në ngjyrë smeraldi dhe blu u bë një nga veshjet më të interesante të historisë së modës.
Vetë këngëtarja ka thënë se, fustani ishte mjaft provokues, gjë që tërhoqi vëmendjen e njerëzve.

“Mendoj që fustani ishte mjaft provokues, për t’i bërë njerëzit që të kishin interes. Kur fustani u hap, të gjithë menduan se çfarë do të ndodhë më pas, por asgjë nuk ndodhi, pasi ai ishte kapur mirë”, tha Lopez për Vogue, 20 vite më pas.

Sipas ish-CEO-s dhe kryetarit ekzekutiv të Google, Eric Schmidt, informacionet rreth këtij fustani ishin më të kërkuarat në Google në atë kohë.

“Njerëzit donin më shumë sesa thjesht tekst”, shkroi ai për Project Syndicate në vitin 2015.

Përpara se të krijohej Google Image Search, në Google mund të gjeje vetëm linqe dhe tekste. Google Image Search u lançua në vitin 2001.

Edhe pse të gjitha meritat i njihen Jennifer Lopezit, fustanin e gjelbër fillimisht e kishte veshur stilistja Donatella Versace për Met Gala në vitin 1999. Ndërsa më pas, ai u vesh nga Ginger Spice Geri Halliëell në NRJ Music Awards në vitin 2000, vetëm një muaj para Lopez.

Por asnjë dalje nuk kishte shkaktuar një bujë të tillë si kur u mbajt veshur nga Jennifer Lopez në Grammy.

Për të shënuar 20-vjetorin e atij momenti, Versace përgatiti një version të ri të fustanit legjendar për të mbyllur shfaqjen Pranverë-Verë 2020 në Javën e Modës në Milano, duke kërkuar edhe një herë ndihmën e Jennifer Lopezit për të sfiluar me veshjen.

Kur publiku pa fustanin e ripunuar ata u ngritën në këmbë dhe duartrokitën.

“Ishte e mahnitshme fuqia e një momenti në kohë, fuqia e modës”, tha Lopez pas shfaqjes.