Ish-kryetarja e Kongresit të SHBA-së, Nancy Pelosi, ftoi priftërinjtë në shtëpinë e saj për të kryer një ekzorcizëm në nëntor, një muaj pas një sulmi ndaj burrit të saj Paul, tha vajza e saj për New York Times të dielën, shkruan New York Post. Alexandra Pelosi shpjegoi se nëna e saj ndihej ‘vërtet fajtore’ për lëndimet që mori burri i saj.

Sulmi ‘e rëndoi shumë në shpirtin e saj’, tha ajo për nënën e saj, duke sugjeruar se ai ‘e theu me të vërtetë’ politikanen e karrierës.

“Gjatë Ditës së Falënderimeve, ajo kishte priftërinj që vinin, duke u përpjekur të bënin një ekzorcizëm të shtëpisë dhe duke kryer shërbime lutjesh.”

Sulmuesi i Paul Pelosit, emigranti i paligjshëm kanadez David DePape, dyshohet se kishte kërkuar Nancy-n, e cila nuk ishte në shtëpi, kur e gjeti bashkëshortin e saj Paul duke fjetur në një dhomë gjumi. Policia deklaroi se dyshja u gjetën duke luftuar për një çekiç dhe se DePape sulmoi Pelosin me të pasi oficerët i thanë të hidhte armën.

Nancy Pelosi konfirmoi për Chris Wallace të CNN të dielën se ajo ndjehej ‘shumë e trishtuar’ për sulmin ndaj burrit të saj.

Paul ende nuk është ‘kthyer në normalitet’ dhe mund të mos ‘të jetë vërtet vetvetja’ për tre ose katër muaj të tjerë, vazhdoi ajo. 82-vjeçari investitor i pasurive të paluajtshme pësoi një thyerje të kafkës dhe plagë në krahun e djathtë dhe duart gjatë sulmit.

DePape dyshohet se hyri në shtëpinë e Pelosit më 28 tetor me shpresën për të frenuar dhe ‘marrë në pyetje’ kongresmenen demokrate, sipas një deklarate federale. Nëse DePape mendonte se Pelosi po e ‘gënjente’, ai planifikoi t’i thyente kapakët e gjurit si një paralajmërim për kolegët e saj në Kongres se veprimet e tyre kishin pasoja, thuhet në deklaratën që ai i tha policisë.