“Wednesday” rrëzoi nga froni “Stranger Things” në lidhje me shifrat e shikueshmërisë përsa i përket javës së parë të publikimit. Spin-off i “The Addams Family” zuri vendin e parë për shifrat e shikueshmërisë në javën e parë të lançimit, duke arritur 341.2 milionë orë shikueshmëri në Netflix. Sezoni i katërt i “Stranger Things” arriti në 335 milionë orë shikime. Kjo e bën “Wednesday” serialin më të suksesshëm ndonjëherë në gjuhën angleze në historinë e Netflix.

Netflix vlerëson se 50 milionë familje në mbarë botën kanë parë një pjesë ose të gjithë serialin, ku Jenna Ortega luan rolin e vajzës me të njëjtin emër të familjes së famshme. “Wednesday” u rendit në #1 në 83 vende anembanë botës dhe krenohet me kastin e aktorëve si Catherine Zeta-Jones, Gwendoline Christie dhe Christina Ricci. Christina Ricci ka luajtur pikërisht rolin e Wednesday në “The Addams Family” e vitit 1991.

Sidoqoftë, as “Stranger Things” dhe as “Wednesday” nuk tejkaluan “Squid Game”, i cili grumbulloi 571.76 milionë orë shikime në javën e tij të parë të publikimit. “Wednesday” përqendrohet te Wednesday Addams, vajza e Morticia dhe Gomez, teksa përpiqet të zgjidhë një mister në shkollën e saj të re. Shifrat e shikueshmërisë janë një lajm i mirë për Netflix në një kohë kur platforma po përballet me konkurrencën e Amazon Prime, Apple TV dhe Disney+.