Mosha kur nis menopauza dhe sa vjet zgjat ?

Sa vjet zgjat menopauza? Ja çfarë thotë mjeku!

Mjeku endokrinolog Thanas Furreraj thotë se menopauza mund të zgjasë deri në 13 vjet, duke llogaritur edhe periudhën post menopauzës. Duke folur për trajtimin mjeku thekson se duhet një kujdes i veçantë, sidomos për medikamentet që duhen të merren. Doktor Furreraj i ftuar në Intervistën e Ditës në Dritare TV thotë se është i domosdoshëm trajtimi me specialistë, të cilët përcaktojnë trajtimin pasi janë siguruar më parë për shëndetin e gruas dhe sëmundjet që mund të ketë ato, në periudhën e menopauzës.

“Mosha kur nis menopauza është 46 deri 50 vjeç. Kur ndodh para moshës 45 vjeç është e parakohshme. Po qe para moshës 40 vjeç është pamjaftueshmëri e vezoreve për të prodhuar hormone femërore. Por edhe kjo është menopauzë dhe do trajtuar si e tillë. Nëse ulet prodhimi i hormoneve femërore, atëherë hormonet mashkullore dalin rrjedhimisht më të larta. Kështu ato nisin të shfaqin efekte. Cilat janë efektet? Për shembull, i keni parë gratë rreth moshës 45-50 vjeç, fillojnë të kenë më shumë qime. Probleme që duhen trajtuar.

Por sa zgjat menopauza?
Mund të vazhdojë deri në 13 vjet. Por 13 vjet janë shumë. Dhe në të tilla raste duhet trajtuar. Por që të trajtosh një grua në menopauzë, duhet të sigurohesh që nuk ka problematika të tjera. Duhet të gjesh medikamentet e duhura, me pak efekte anësore”, u shpreh Furreraj në Dritare TV