Kryeministri Edi Rama ka dhënë një intervistë për BBC, ku ka folur për shqetësimet e Britanisë lidhur me numrin e lartë të emigrantëve shqiptarë të paligjshëm. Kreu i qeverisë ka akuzuar Mbretërinë e Bashkuar se po gjen justifikime për “politikat e dështuara” të saj për kufijtë dhe migracionin.

Rama komentoi edhe deklaratën e Sekretares së Brendshme Suella Braverman, e cila tha pak ditë më parë se Britania po “pushtohet” nga emigrantët. Ai tha se komenti “pushtim” i Braverman ishte “i çmendur” dhe ai e kishte patur “të pamundur të mos reagonte”.

Më tej kryeministri shtoi: “Nuk bëhet fjalë për një person. Ka të bëjë me klimën që është krijuar dhe ka të bëjë me gjetjen e kockave të kurbanit dhe fajësimin e të tjerëve. Nuk bëhet fjalë për shqiptarët, as alienët apo gangsterët, por ka të bëjë me politikat e dështuara për kufijtë dhe krimin. Unë admiroj gjithçka që përfaqëson Britania. Por me të vërtetë jam i neveritur për këtë lloj politike që në fund është e dënuar të dështojë.”

Pak informacion për emigrimin e paligjshëm të shqiptarëve në Britani

Javën e kaluar, Britania tha se 12,000 shqiptarë kishin shkuar ilegalisht përmes Kanalit të La Manshit përgjatë këtij viti, krahasuar me 50 persona në 2020. Rreth 7627 shqiptarë kërkuan azil në Britaninë e Madhe deri në qershor, më shumë se dyfishi i një viti më parë.

Shqiptarët kanë më pak gjasa për t’u dhënë azil sesa kombësitë e tjera, me normën aktuale në 53% krahasuar me 76% për kombësitë e tjera.

Në muajt deri në qershor 440 persona u kthyen në Shqipëri nga qendrat e paraburgimit të imigracionit.  Shqiptarët përfaqësonin gjithashtu numrin më të madh të shkelësve të huaj të dërguar në vitin deri në mars 2022.