Elon Musk premton të kthejë Trump në Twitter

Elon Musk premton të kthejë Trump në Twitter sapo të nënshkruhet marrëveshja finale

Marrëveshja prej 44 miliardë dollarësh pritet të nënshkruhet këtë të premte rreth orës 17:00. 

Elon Musk dhe Donald Trump

SHBA– Themeluesi i Tesla-s Elon Musk deklaroi se do rikthejë ish-presidentin e SHBA-së Donald Trump në Twitter sapo ai të marrë zyrtarisht në dorë “çelësat” e kompanisë. Marrëveshja prej 44 miliardë dollarësh pritet të nënshkruhet këtë të premte rreth orës 17:00. 

“Ndalimet e përhershme duhet të jenë jashtëzakonisht të rralla. Unë mendoj se nuk ishte e drejtë ndalimi i Donald Trump”, tha Musk.

“Arsyeja pse bleva Twitter-in është sepse është e rëndësishme për të ardhmen e qytetërimit që të ketë një shesh të përbashkët digjital, ku një gamë e gjerë besimesh mund të debatohet në një mënyrë të shëndetshme pa u drejtuar ndaj dhunës”, shkruan mes të tjerash Musk.

Trump u hoq nga Twitter dhe platforma të tjera të mëdha të mediave sociale pas ngjarjeve në Kapitolin e SHBA më 6 janar 2021. Ish-presidenti u akuzua për nxitjen e mbështetësve të tij për trazira në Kapitol, ndërsa Kongresi ishte në seancë për të certifikuar zyrtarisht fitoren e Presidentit të zgjedhur Joe Biden në Kolegjin Zgjedhor. 

Më parë Musk ishte shprehur se ndihej i tronditur për ndalimin e Trump nga Twitter.