Në prag të zgjedhjeve vendore, qeveria ka vendosur të zgjerojë administratën publike. Administrata shtetërore do të ketë 548 punonjës më tepër gjatë vitit të ardhshëm.

Kjo përkthehet në “barrë” për buxhetin dhe vendimi vjen në kohë krize, ku qeveria mund t’i kishte alokuar ato fonde në një interes më të mirë për qytetarët.

Nga kjo shtesë në strukturën e punonjësve do të përfitojnë disa ministri, por numri më i lartë pritet të emërohen në ministrinë e Infrastrukturës, e cila do të ketë 155 persona më shumë.

Po ashtu edhe ministria e Brendshme do të ketë një numër të konsiderueshëm të punonjësve të rinj nëse e krahasojmë me vitin aktual saktësisht stafit të ministrisë do i shtohen 139 persona.

Nëse bëjmë një vlerësim në 5 vitet e fundit qeveria e majtë ka shtuar të punësuarit në administratë me rreth 2 mijë e 642 persona. Kjo është një praktikë e njohur tashmë në prag të zgjedhjeve. Kujtojmë që para zgjedhjeve të 25 prillit, qeveria shtoi rreth 700 punonjës të ri në administratë.

Shtesat e punonjësve sipas ministrive

Ministria e Infrastrukturës 155
Ministria e Brendshme 139
Ministria e Financave 57
Ministria e Bujqësisë 42
Kryeministria 19
Ministria e Arsimit 15