Kryetari i Partisë Demokratike Sali Berisha deklaroi se sulmi kibernetik i 15 korrikut u bë nga hakera qeveritarë me qëllim zhdukjen e lidhjeve mes qeverisë dhe krimit.

“Natyrisht, sistemi TIMS, sipas burimeve serioze, është sulmuar nga hakera qeveritarë, me qëllim për të zhdukur të gjitha gjurmët e lidhjeve të qeveritarëve, deputetëve, me grupet kriminale dhe trafikantët, udhëtimet e tyre të përbashkëta, të cilat janë një provë e pakontestueshme e bashkëpunimit të krimit me politikën. Kurse, nxjerrja e të dhënave të kartotekës, përbën shkallën më ekstreme të dekonspirimit dhe dorëzimit të këtij shteti mafioz, tërësisht në duart e krimit”, tha Berisha.

Eksperti i kriminologjisë Ervin Karamuço ngriti alarmin se hakerat iranianë kanë publikuar informacionin e sistemit MEMEX duke theksuar se është vënë në pikëpyetje siguria e vendit.

Berisha tha se kjo dëshmon se gjithçka në këtë vend është në duart e krimit dhe se ndodhemi para një situate të rrezikshme. Ai tha se hakerat kanë bërë publikë emrat e 105 mijë shqiptarëve të dyshuar dhe të hetuar për vepra të ndryshme kriminale.

“Siç kisha denoncuar para jush, vendosjen nën kontroll të plotë nga krimi shtetëror i të gjitha të dhënave të këtij vendi, me gjithë mohimet e papërgjegjshme të kreut të këtij shteti që funksionon si një shtet i mafies, njoftimi i mëparshëm rezulton 100% i vërtetë. Sot nga sistemi MEMEX që përbën kartotekën e punës 30 vjeçare të policisë së Shtetit janë publikuar 105 mijë emra shqiptarësh të dyshuar, të hetuar nga policia për krime të llojeve nga më të ndryshmet.

Nga sistemi janë ekspozuar emrat në mënyrë që të paralajmërohen të gjithë ata të cilët janë në vëzhgim, janë në hetim, janë në shqyrtim për aktivitete të ndryshme kriminale.
Ky është një moment jashtëzakonisht të rrezikshëm për vendin, një moment që dëshmon se cdo gjë në këtë shtet të mafies ndodhet në duart e krimit”, deklaroi Berisha.