Vila luksoze e presidentit Zelensky në Itali, iu jepet me qira rusëve? Pronari i agjencisë shpjegon gjithçka

Në fillim të luftës, presidenti ukrainas kishte bërë një apel që të mos priten turistët rusë në Itali dhe të bllokohen jahtet dhe mallrat e tyre

Pas lajmeve se vila e vendosur në Forte dei Marmi, në pronësi të presidentit të Ukrainës Volodymyr Zelensky, i është dhënë me qira një çifti rus, të cilët jetojnë në Londër, ka reaguar pronari i agjencisë Real Estate Villas, i cili mohoi lajmin. Ai ka thënë se kanë një mandat specifik që nuk i lejon t’ua japin me qira rusëve apo ukrainasve.

“Nuk kishte rusë apo ukrainas në vilën e presidentit të Ukrainës Volodymyr Zelensky”, thotë Claudio Salvini, i cili mohon thashethemet. “Ajo që është shkruar është hamendje. Vila i është dhënë me qira një çifti për të kaluar verën. Nuk do t’ju them nëse ata banojnë ose jo në Londër, por ju siguroj se nuk mund të jenë rusë sepse ne e kemi të ndaluar t’ua japim rusëve dhe ukrainasve”, nënvizon Salvini.

“Vila e Vittoria Apuana-s është e regjistruar në emër të një kompanie italiane që i përket një tjetre në Qipro dhe është e gruas së Zelenskit, e cila na dha një mandat për të dhënë vilën me qira. Nëse dikush ka dëgjuar të flitet rusisht në atë shtëpi, është sepse qiramarrësi mund të ketë pasur mysafirë që flasin rusisht”, shtoi ai.

Lajmi për çiftin e dyshuar rus që kishte marrë me qira vilën e liderit ukrainas, qarkullonte prej disa ditësh në Versilia dhe u raportua nga ‘Il Tirreno’.

Në fillim të luftës, presidenti ukrainas kishte bërë një apel që të mos priten turistët rusë në Itali dhe të bllokohen jahtet dhe mallrat e tyre. Sipas ‘Il Tirreno’ kishte pasur një negociatë me disa turistë koreanë të cilët ishin të gatshëm ta merrnin me qira në gusht nga 50 deri në 70 mijë euro. Marrëveshja, megjithatë, nuk u realizua.