Mix
Pas katër vitesh, merr fund lidhja e Leonardo DiCaprio-s dhe Camila Morrone
Pas më shumë se katër vitesh lidhje, Leonardo DiCaprio dhe Camila Morrone janë ndarë. Burime të shumta thanë për People se çifti nuk është më bashkë.
Aktori dhe modelja u lidhën për herë të parë në dhjetor 2017-ës. 23 vitet e diferencës së moshës Camila i komentoi njëherë kështu: “Unë thjesht mendoj se çdokush duhet të jetë në gjendje të jetë me atë që dëshiron të jetë”.
Pavarësisht interesit të lartë të publikut, DiCaprio dhe Morrone bënë përpjekje të mëdha për ta mbajtur romancën e tyre private. Ata kurrë nuk ecën në tapetin e kuq së bashku, megjithëse u ulën në rreshtin e parë në Oscar Awards, në 2020-ën.
Dje, vetëm dy muaj pas ditëlindjes së 25-të të Morrone, burime të shumta thanë për People se modelja dhe DiCaprio janë ndarë. Përfaqësuesit e të dyve nuk pranuan të komentojnë mbi lajmet.
