Vrasjet e ditëve të fundit, Berisha: Policia numëron gëzhojat, Rama inkurajon bandat me thirrjet e tij për vrasje

Vrasjet e ditëve të fundit, Berisha: Policia numëron gëzhojat, Rama inkurajon bandat me thirrjet e tij për vrasje

Kryetari i Partisë Demokratike, Sali Berisha, komentoi ngjarjet e fundit kriminale në vend, ku disa persona kanë mbetur të vrarë në atentate dhe sherre për motive të dobëta.

“Gjatë kësaj jave, shqiptarët kanë parë se rendi dhe siguria e tyre janë tërësisht në dorë të bandave dhe krimit.

Në një hark kohor 12 orë u përgjakën rrugët e Elbasanit, Sarandës dhe Panajasë në Vlorë. Nuk duhet të marr hua një shprehje në të cilën policia rezulton për të numëruar gëzhojat, por dua të them se policia rezulton për të na thënë kryesisht se vrasësit u zhdukën në drejtim të paditur”, tha Berisha.

“E vërteta është se, substrati i këtyre përgjakjeve, i këtyre vrasjeve, qëndron në faktin se janë bandat e krimit që kontrollojnë në çdo qelizë këtë shtet. Janë në një farë mënyre shteti real i këtij vendi.

Ndërkohë, platforma zyrtare e Edi Ramës për luftën kundër krimit siç e dini është hani sa më shumë kokën e njëri-tjetrit.

E thotë këtë një kryeministër i cili qeveris në një vend që ka firmosur Konventa Ndërkombëtare dhe e ka ndaluar me Kushtetutë dënimin me vdekje. Pra, atë që shteti e ka ndaluar, kryeministri i vendit ua lejon bandave dhe inkurajon bandat me thirrjet e tij për vrasje.

Dënoj me ashpërsinë më të madhe këtë qëndrim, dënoj vrasjet e shëmtuara në rrugët dhe sheshet e qyteteve.

Garantoj shqiptarët se qëndrimi ynë do të jetë zero tolerancë ndaj krimit.

Ne do t’u japim bandave të qeverisë atë vend që meritojnë së bashku me qeverinë e tyre”.