Denoncimi i PD: Pse u kaluan dje 2 miliard lekë tek administratorët e inceneratorëve? Veliaj i ‘qerasi’ me 878 mln lekë

Pse, edhe kur ka një urdhër arresti ndërkombëtar, si për Zoton dhe Gugalljan, në llogaritë e tyre vazhdojnë të derdhen qindra miliona lekë?

Partia Demokratike ka ngritur disa pyetje të tjera lidhur me çështjen e inceneratorëve. Në një deklaratë për mediat, anëtari i Këshillit Kombëtar, Jamarbër Malltezi deklaroi se po lobohet shumë për të “varrosur” të ashtëquajturën aferë e inceneratorëve, që sipas tij, ka marrë qindra miliona euro.

Ai bëri me dije se Partia Demokratike, duke filluar që sot, do të dalë çdo ditë për të bërë “pesë pyetje për inceneratorët”. Malltezi theksoi se administratorët e inceneratorëve Klodian Zoto dhe Stela Gugallja përfituan dje, 3 herë brenda ditës nga 627 milion lekë nga qeveria. Ai shtoi se para dy ditësh ishte Erion Veliaj që i ‘qerasi’ me 878 milionë lekë.

Pyetjet që ngriti Malltezi: 

1.Pse, pavarësisht faktit se Inceneratori i Fierit nuk funksionon, Edi Rama dhe Belinda Balluku derdhën dje, me 1 Gusht 2022, 3 herë nga 627 milion lekë në kontot e Zotos dhe Gugalljes?

2.Pse, edhe kur ka një urdhër arresti ndërkombëtar, si për Zoton dhe Gugalljan, në llogaritë e tyre vazhdojnë të derdhen qindra miliona lekë?

3.Pse, pavarësisht faktit se Inceneratori i Tiranës është imagjinar, ende nuk i janë hedhur as themelet, Erion Veliaj çon 878 milionë lekë në kontot e Zotos dhe Gugalljas?

4.Pse SPAK nuk sekuestron produktet e korrupsionit të Edi Ramës?

5.Pse, kur na thuhet se nuk ka lekë për të kompensuar rritjen e cmimeve për shtresat në nevojë; nuk ka lekë për të pastrehët nga tërmeti; nuk ka lekë për të kompensuar rritjen e cmimit të naftës dhe ushqimeve; paska qindra miliona lekë për partnerët e Edi Ramës, si Klodian Zoto e Stela Gugallja, me urdhër arresti ndërkombëtar?