Ilir Meta ka dhënë mesazhin e fundit si President i Republikës. Përmes një postimi në rrjetet sociale, ai thotë se ishte nder dhe privilegj të shërbente këto pesë vite si President.

Ndërsa uron më të mirën për atdheun dhe familjet shqiptare, Meta shkruan:

Ishte një nder dhe privilegj i jashtëzakonshëm të shërbeja këto pesë vite si President i Republikës të Shqipërisë.

Uroj për atdheun dhe kombin tonë më të mirën! Paqe dhe mbarësi për çdo familje shqiptare! Zoti e bekoftë Shqipërinë!

Meta u zgjodh President më 28 prill 2017 me 88 vota pro dhe dy kundër. Mandati i tij përfundon sot. Në këto pesë vite, qëndrimet e Metës shpesh kanë qenë edhe të prera duke u përfshirë shpesh në përplasje me mazhorancën.

Ai ka paralajmëruar se nga nesër do t’i rikthehet politikës aktive, por mbetet për të parë nëse Meta do të marrë sërish drejtimin e LSI-së, forcës që krijoi vet në vitin 2004. Megjithëse, në një deklaratë të disa kohëve më parë, bashkëshortja e tij, aktualisht kryetarja e LSI-së, Monika Kryemadhi deklaroi se drejtimi i kësaj partie është “një kostum që i ri ngushtë Metës”.

Ky i fundit do të pasohet në detyrë nga Bajram Begaj, i zgjidhur President nga radhët e ushatarakëve, me kontestimin e opozitës dhe votat e mazhorancës.