Një klip i marrë nga një transmetim britanik i vitit 1999 është bërë sërish viral këto ditë sepse u përmend nga Victoria Beckham gjatë një interviste me Vogue Australia, revistë e cila i kushton asaj kopertinën e korrikut.

Dizajnerja duke iu referuar asaj që rëndom quhet “body shaming”, solli shembullin se si pamja dhe trupi i saj kanë qenë gjithmonë objekt i vëmendjes mediatike, veçanërisht kur ajo ishte pjesë e grupit Spice Girls.

Në klip, Victoria Beckham shihet duke u ftuar nga Chris Evans, drejtuesi i emisionit Don’t Forget Your Toothbrush, për tu ngjitur në një peshore për të kontrolluar peshën e saj live vetëm dy muaj pasi solli në jetë djalin e saj Brooklyn.

Ja si e kujtoi Posh Spice ngjarjen e turpshme gjatë intervistës për Vogue Australia.

“Unë shkova në një shfaqje televizive me Chris Evans shumë vite më parë. Sapo kisha lindur Brooklyn dhe humba shumë peshë më pas,” tha stilistja për incidentin poshtërues. “Kjo i ka ndodhur edhe mamasë sime pas shtatzënisë dhe nuk do të thotë që ka lidhje me një çrregullim të të ngrënit. Më bëri të qëndroja në peshore për t’u peshuar. A mund ta imagjinoni ta bëni këtë në ditët e sotme?” shtoi Beckham.

Në klip, Evans e pyet Vickorian: Shumë vajza duan të dinë, sepse ju dukeni përsëri fantastike, si u kthyet në formën tuaj pas lindjes?

Beckham zbuloi në atë kohë se ajo nuk po stërvitej por ka humbur peshë normalisht.

Pesha e Victorias ishte 50 kg.