Integrimi, Lubonja: Pse Rama është i kënaqur që morën “Jo” nga BE

Integrimi, Lubonja: Pse Rama është i kënaqur që morën “Jo” nga BE

Analisti Fatos Lubonja komentoi bllokimin e rrugës së integrimit për Shqipërinë dhe Maqedoninë e Veriut drejt BE në samitin e mbajtur sot në Bruksel.

I ftuar në emisionin “Frontline”  në News24, Lubonja u shpreh se kryeministri Edi Rama është i kënaqur që Shqipëria mori sërish një ‘Jo’, pasi sipas tij vendi nuk është gati për t’u anëtarësuar në BE.

“Mendoj se Rama ka ndjerë një lloj presioni, edhe të opinionit ndoshta, por besoj se nuk është më e rëndësishmja pse ndryshoi Rama. Dihet që këta kanë një projekt alternativë, paralel, “Ballkanin e Hapur”, por që njëkohësisht pretendojnë se nuk është kundër idesë së Evropës.

Hipotezat mbi këtë projekt janë të shumta, por njëra është se në këtë mënyrë i bëhet presion Evropës, që neve po ecim këtej, presion moral mund ta quajmë. Për mendimin tim kjo është një fasadë.

Lepuri fshihet këtu, që Rama, siç është i buzëqeshur te fotografia, është edhe i kënaqur që po marrim “Jo”. Kjo në kuptimin, se Shqipëria nuk e meriton. Nëse hyn atje, duhet bërë me seriozitet edhe nga Evropa, duke parë standardet e Shqipërisë. E keqja e debatit është se duket sikur ne i kemi plotësuar, i kemi të gjitha në rregull, dhe del Bullgaria e na bllokon”, tha Lubonja.