Burimi nëntokësor i Syrit të Kaltër ‘i dorëzohet’ grekëve: Qeveria po planifikon ta transferojë në Greqi

Burimi nëntokësor i Syrit të Kaltër ‘i dorëzohet’ grekëve: Qeveria po planifikon ta transferojë në Greqi

Pas çështjes së detit, grekët këtë herë kanë shënjestruar edhe burimit nëntokësor të Syrit të Kaltër.

Deputetja demokrate Ina Zhupa ka denoncuar skandalin. Në një postim në Facebook, Zhupa shkruan se në një artikull të botuar nga media greke ERT News, thuhet se Shqipëria dhe Greqia janë duke përgatitur një marrëveshje për të transferuar ujin e burimit nëntokësor të Syrit të Kaltër në Greqi.

Zhupa citon edhe fjalën e kryetarit të Bashkisë Korfuzit të Veriut, George Machimaris, i cili thotë se po punohet për transferimin e ujit nga Shqipëria në Greqi. Kujtojmë se Syri i Kaltër është park natyror dhe e ka fituar statusin e zonës së mbrojtur që në vitin 2002.

Postimi i plotë:

Të transferojnë ujin e burimit nëntokësor të Syrit të Kaltër në Greqi, kjo mund të jetë papërgjegjshmëria dhe çmenduria e rradhës e Qeverisë Rama!

Media greke ERT NEWS tregon se po përgatitet një marrëveshje mes Greqisë dhe Shqipërisë për të ndërhyrë tek Syri i Kaltër në Sarandë dhe për t’ia transferuar ujin e kulluar të burimit nëntokësor Greqisë. Kryetari i Bashkisë së Korfuzit të Veriut, George Machimaris ka ngritur sërish çështjen e transferimit të ujit nga Shqipëria: “Me ndjenjën e përgjegjshmërisë ndaj shoqërisë sonë, ndaj vizitorëve tanë, ne i jemi nënshtruar një propozimi/memorandumi teknik për furnizimin me ujë me transferim burimi nga SYRI I KALTËR i Shqipërisë fqinje, duke marrë në konsideratë dhe shfrytëzuar përvojën e tubacionit nëndetësor që lidh ujësjellësin e Aeginës me EYDAP në Salaminë, përvojën e akumuluar të pushtetit vendor dhe studime ekzistuese si ai i Politeknikut (1991).”

Syri i Kaltër është park natyror dhe ka statusin zonë e mbrojtur nga viti 2002. Punimet, tubacionet, ndërhyrjet do ishin kategorisht të ndaluara dhe në dëm të kësaj pasurie kulturore.

Saranda, Delvina, qytetet e tjera vuajnë nga mungesa e ujit të pijshëm por ska shkuar kurrë ndërmend një ndërhyrje e tillë e paligjshme në Syrin e Kaltër.

Si mund të mendohej që kjo ndërhyrje e paligjshme të bëhej për të furnizuar Greqinë?!