Kryetari i Partisë Demokratike Sali Berisha zhvilloi një takim me avokatët për të folur mbi problematikat e sistemit të drejtësisë dhe hartës së re gjyqësore.

Në tryezën e përbashkët me avokatët dhe ekspertë në fushën e drejtësisë, Berisha u shpreh se harta e re gjyqësore e miratuar është në kundërshtim me Kushtetutën dhe Konventën Evropiane të të Drejtave të Njeriut.

Berisha tha se reforma e George Soros shkatërroi sistemin e drejtësisë në Shqipëri, në një kohë kur supozohej që reforma t’i jepte shqiptarëve një sistem më të drejtë.

Kryedemokrati tha se qëllimi i Edi Ramës është të përqendrojë në duart e tij drejtësinë. Ndërkaq Berisha shtoi se drejtësia në Shqipëri ka në krye një ‘satrap’ siç është Sokol Sadushi i cili ka përqendruar të gjitha çështjet në duar. Kryedemokrati tha se Rama po synon që gjykimin në Apel t’ia dorëzojë bashkëshortes së Sadushit, duke e kthyer Apelin në sundimin e çiftit Sadushi.

“Harta e re gjyqësore e cila vjen në kundërshtim flagrant me Kushtetutën, Konventën Evropiane të të Drejtave të Njeriut, është kapaku që i vihet arkivolit në të cilin e mbylli reforma e drejtësisë sistemin e drejtësisë në Shqipëri.

Shqipëria kaloi në një proces unik në planetin Tokë. Asnjë vend asnjë komb, asnjë pushtues nuk ka guxuar t’i shkatërrojë një veni tjetër një kombi sistemin e drejtësisë, siç e shkatërroi reforma e Soros drejtësinë në Shqipëri. Një reformë do të synonte që shqiptarët të kishin një sistem më të drejtë, dhe kjo reformë e rrënoi.   

Një nga megaferat korruptive më të mëdha të kohës. Për të mbyllur gjithë këtë katastrofë kërkojnë të ndërtojnë një hartë të re gjyqësore e cila vjen në kundërshtim flagrant të largësisë për ofrimin e këtij shërbimi. Tani kërkojnë ku është qëllimi. Të përqendrojnë vendimin.

Çfarë ndodh sot në drejtësinë shqiptare? Drejtësia shqiptare ka një satrap, dhe ky satrap quhet Sokol Sadushi. Në gjykatën e Lartë asnjë çështje nuk del pa shqyrtim pa vendosur Sadushi. T gjitha çështjet me shtetin administrative i shqyrton Kolegji Administrativ që kryesohet nga Sadushi. Të gjitha çështjet për energjinë, karburantin kanë anëtar këshilli Sadushin. Edi Rama kërkon ta përqëndrojë gjykimin në Apel në dorë të bashkëshortes të Sadushit, Edlira Petro, e cila edhe sot bën ligjin, bën dalldi. Gjykata e Apelit është e tëra në sundimin e çiftit Sadushi. Tani që Rama të ushtrojë kontrollin total në të gjitha çështjet duhet që kjo gjykatë të jetë në Tiranë”, tha Berisha.