Kryetari i Partisë Demokratike Sali Berisha

Kryetari i Partisë Demokratike Sali Berisha ka reaguar ashpër në lidhje me vendimin e  Bordit Drejtues për rritjen e çmimit të naftës. Në një postim në rrjetin e tij social Facebook, kreu i opozitës Berisha, shprehet se, Bordi komunist i Edi Ramës nuk ka të ndaluar duke e çuar çmimin e naftës në 265 lekë për litër. Sipas Berishës kjo është një rritje tjetër stratosferike e çmimit të naftes.

“Çmimi i naftës shënon sot një tjetër rekord. 265 lekë për litër do të paguajnë shqiptarët duke nisur prej ditës së sotme. Çmënduri! Abuzim! Vjedhje! Krye-hajduti ka vendosur të zhvasë çdo qindarkë nga familjet shqiptare, duke e çuar në stratosferë çmimin e naftës, nëpërmjet bordeve me mendësi komuniste. Me naftën po bëhej një abuzim i tejskajshëm në vend. Edhe pa krijimin e bordeve situata ishte alarmante, por u zhyt edhe më thellë që në momentin e krijimit të bordeve të vjedhjes”, shprehet Berisha.

Sipas tij, çmimi i naftës në rajon ka një diference të madhe me Shqipërinë, e faji këtu është kryekëput i qeverisë dhe Edi Ramës. “Masa të menjëhershme duhen ndërmarrë ose çmenduria e këtij njeriu do të dëmtojë ekonominë e çdo qytetari shqiptar”, thekson kreu i opozitës.