Lufta në Ukrainë/ Maturantja ukrainase pozon para shkollës që i shkatërruan rusët

Pasojat e luftës janë shumë të rënda. Sidomos për qytetarët e shtetit që bie pre e sulmit dhe agresionit. Tashme kanë kaluar mbi tre muaj nga koha kur trupat ruse u futën në Ukrainë duke bombarduar me dhjetëra qytete. Për popullsinë vendëse pasojat kanë qenë shumë të renda. Në disa qytete qytetarët kanë filluar aktivitetet e tyre, por gjithmonë përballë kanë pasojat e tmerrshme të kësaj lufte që nuk dihet akoma se kur do të mbarojë.

Deri tani në lajme keni parë ngjarje të ndryshme që tregojnë se jeta vazhdon. Kemi parë të rinj që martohen dhe të tjerë që duan t’i rikthehen punës që kishin para se të fillonte sulmi. Të rinjtë duan të rifillojnë shkollën për në shumë raste nuk kanë se ku ta fillojnë.

Një foto i preku të gjithë dhe mori vëmendjen e të gjitha mediave ndërkombëtare. Mediat shkruan për maturanten nga Ukraina, Anna Episheva. Ajo ka veshur fustanin e saj të festës së maturës dhe ka shkuar tek gjimnazi ku studionte para luftës.

E veshur me një fustan të kuq ajo u fotografua në rrënojat e shkollës, ku tavani i ishte i këputur plotësisht nga shpërthimet, asnjë gjurmë dyersh, tullat e kuqe të mureve janë të thërrmuara, duket dheu dhe rrënojat.

Një foto sa një mijë fjalë. Komentet në të tilla raste janë të tepërta.