Në fillim të muajit prill të këtij viti, Kastrati Group bleu 60% të aksioneve të Euronews Albania.

Me këtë investim, oligarku shqiptar u bë aksioneri më i madh i filialit të Euronews në Shqipëri, aksione që më parë i përkisnin biznesmenit shqiptar Theodori Çami.

Por, rreth dy muaj më pas, Euronews Albania e ka ndërprerë kontratën me Kastratin, konfirmojnë burimet pranë Euronews.

Mësohet se shkak për këtë vendim ka qenë ndërhyrja e vazhdueshme e kompanisë private në punët e brendshme të televizionit, përtej asaj që parashikonte marrëveshja e nënshkruar mes palëve.

Për këtë arsye është parë e udhës që televizioni të ndërpresë menjëherë kontratën.  

Shefqet Kastrati është biznesmen i njohur në Shqipëri dhe është përfolur për lidhjet e tij të ngushta me politikën dhe Kryeministrin Edi Rama.

Kastrati e ka fituar edhe tenderin e mirëmbajtjes së “Rrugës së Kombit”, rrjedhimisht prej më shumë se tre vitesh kompania e tij llogaritet se i përfiton miliona në muaj nëpërmjet taksës 5 Euro për një drejtim.