Ministri i Jashtëm grek, Nikos Dendias deklaroi pak ditë më parë se çështja e detit Shqipëri-Greqi do të zgjidhet me ikjen e presidentit Ilir Meta dhe zgjedhjen e një presidenti, duke theksuar se kreu aktual i shtetit nuk i ka dhënë autorizimet përkatës e kryeministrit për të vijuar më tej.

Kjo pikë është cekur nga kreu i PD, Sali Berisha në foltoren e Kuvendit. Sipas tij, Rama ka paditur Ilir Metën tek Dendias, teksa e ka cilësuar këtë si një akt të ulët.

“Ministri i jashtëm i Greqisë informon kombin e tij dhe botën se Rama ka paditur tek ai Presidentin e republikës. Do u lutesha shqiptarëve ta arsyetojnë vetë këtë akt, se kam të vështirë të vë epitete, por po sqaroj se Presidenti që duhet të japë autorizimin për fillimin e negociatave, pas të cilave çështja do dërgohet në gjykatë.

Një kryeministër që padit kreun e shtetit se i refuzon autorizimin për fillim negociatash ndërkohë që nuk i ka dërguar kërkesë, gjykojeni vetë se çfarë përfaqëson.

Dendias i ka përmendur shumë herë ca lidhje  me Korfuzin, nuk i dija këto. Një akt i ulët që e denoncoj me forcën më të madhe.

Nëse Presidenti nuk i firmoste, ai duhej të informonte opinionin publik, nuk mund të ankohej te ministri pa informuar shqiptarët”, tha Berisha.