Me çfarë tagri i takon politikanët ky zotëri ?!

Eminenca gri…në Ballkan! – Koment nga Iva V. Grillo

Në botën e sotme, të formatuar me rregulla e proçedura të panumërta, është e disi e çuditshme të shohësh një djalë të ri i cili pa pasur një pozicion formal, shfaqet gjithnjë si hije në krah të pothuajse çdo Kryeminstri apo figure që merr një post politik të rëndësishëm në Ballkan …

Ndoshta zotëria e ka një pozicion të tillë, por deri tani askush nuk na e ka thënë.

Në qoftëse zotëria takon, përgëzon, këshillon apo inkurajon politikanët tanë në emër të fondacionit të tij të fuqishëm, atëherë korrekte do të ishte të kishte një komunikim formal nga ana e fondacionit por dhe e qeverisë ku listohen qëllimet e takimit, temat e diskutimeve dhe cfarë të mire publike prodhojnë keto dhënie duarsh e përqafime publike.

Por kur kjo nuk ndodh, me të drejtë lind pyetja: me cfare tagri i takon politikanët ky zotëri?

Si djali i babës së tij të rëndësishëm?

Si filozof, aktivist, bamirës, pasanik, patronazhist politikanësh apo çfarë?

Në çdo pozicion qoftë, meqënëse shfaqet kaq shpesh në mënyrë publike në krah të njerëzve që marrin vendime të rëndësishme për jetën e rajonit, do të duhej një transparencë për pozicionin e këtij zotërie të ri, që duket se i janë hapur dyert “katër kanat’” nëpër zyrat e politikanëve më të rëndësishëm të Ballkanit.

E aq më tepër në rast se zotëria hyn nëpër hapësirat politike si mik personal i dikujt e pastaj përdor pozicionin e tij prej filantropi për të bindur qytetarët e thjeshtë se miqtë e tij politikanë janë “burrat më të mirë” që ekzistojnë… atëherë jemi duke notuar në disa ujëra vërtetë të turbullta ku fjala transparencë nuk ekziston.

Qytetarët paguajnë taksa, por jo për këtë lloj shpërdorimi të ofiqeve publike dhe besimit të tyre!