Berisha nga Korça: Çdo vepër të keqe, Rama e kalon me batuta të filmave të Kinostudios

“Demokratët janë kërcënuar që mos t’i bashkoheshin ‘Foltores’”

Ish-kryeministri Sali Berisha tha gjatë një takimi elektoral në Korçë se demokratët janë shantazhuar e kërcënuar që të mos i bashkohen “Foltores”.

Berisha nuk përmendi emra konkretë, por u shpreh se demokratët janë kërcënuar se do të hiqen nga puna nëse do t’i bashkoheshin lëvizjes së tij.

“Në të gjithë këtë situatë, mund të themi se zhvillim historik, ishte vepra juaj, vepra e demokratëve shqiptarë që ngritën në një afat kohor rekord opozitën e vërtetë shqiptare. U ngritët si misionarë të vërtetë. Këto 10 muaj, kanë qenë muaj presionesh të mëdha mbi ju.

Kanë qenë muaj shantazhesh, kërcënimesh. Njëri ju kërcënonte se do ju heq nga puna po u bashkuat me lëvizjen. Tjetri ju kërcënonte se do ju pushonte gruan apo prindërit nga puna. Tjetri ju kërcënonte se viza amerikane nuk do i shihni me sy. Ne u ngritëm absolutisht si njerëz të apasionuar pas lirisë.

Ne u ngritëm sepse e konsiderojmë pluralizëm jetik për veten tonë, për fëmijët tonë dhe të afërmit tonë. Ne u ngritëm pavarësisht nga privacionet që mund të pësonim” – u shpreh ish-kryeministri.

Duke u ndalur tek projekti për Parkun e Butrintit, Berisha akuzoi kryeministrin Rama se aty do të ndërtohen vila për familjet e qeveritarëve. Ish-kryeministri tha se çdo vepër të keqe, Rama kërkon që ta kalojë me batuta të filmave të vjetër të Kinostudios.

“E shihni çfarë Kam bashkëpunuar ngushtë me Fondacionin Shqiptar-Amerikan. Ata kishin kujdes që Parku të mos prekej. Çfarë ndodhi tani? Për të administruar vendin e zbulimeve arkeologjike, u krijua një fondacion, por mijëra hektarë të tjerë u shkëputën nga parku. 620 vila në kepin e Sillës nga njerëzit e Edi Ramës.

Prishi kishën ortodokse, u ka lënë një rrip toke ndërsa pjesën tjetër do e bëje resort turistik. Ja ka lënë njerëzve të tij, ministrave dhe njerëzve të tij.

Çdo vepër të keqe, kundër qytetarëve e kalon me batuta të filmave të kinostudios.

E kalon me pacipësira dhe me fjalë që s’duihen thënë dhe mendon se në këtë mënyrë mbyll çdo dosje.

Pasuria jonë po vidhet dhe grabitet. Po bëhemi si ata që resurset ishin të mallkuara. Ne duhet t’i kthejmë në pasuri për veten tonë”- tha Berisha.